48cm

升級了！

2011-08-01T12:19:00.000+08:00

唔係講緊升K2，係升級做哥哥喇！2011年7月31日，妹豬出世了！大家都係廣華醫院出世，她重2.68kg比我還重呢！

44個月

2011-08-01T12:17:00.001+08:00

2011年7月28日，3歲8個月，現有98cm高，33.5磅重。已經完成K1，約三星期的暑假後就是K2了！暑期活動開始囉！

43個月

2011-07-03T00:49:00.000+08:00

2011年6月28日，3歲7個月。還有不足一個月的上課日，就完成K1了！到時，亦即是暑假開始喇！暑期的活動，雖然只有三星期，都大致確定了，黎緊下月初就是泳班的開始。

而讀緊的呢，已完成了3個Lego課程，仲拿了一個小證書。

身高體重方面，學校紀錄的數字好像沒變，但抱上手就好重。在港鐵站度那個夠高要買票的仲竟然到位，時運高睇唔到.......

學校生活方面，有人說班上已沒有naughty boy or girl了。咁同邊個玩多呢？講來講去都係d女仔名，最熟的曾經同枱的同學仔由於調位了，已不在名單之中。

2011年5月份總結

2011-07-03T00:37:00.000+08:00

5月1日勞動節假期，是日節目豐富。早上做過多士早餐，說到"做"，即係有人得個"做"，"做"完又話唔食，哼！~ 然後出發到荃灣，在茶餐廳快吃了個午飯，就到荃灣大會堂畫班的展覽。首次參展，應該係講參加才是，因為係付費參加，可展覽出三幅畫並參與其中。去到展覽場地，婆婆也有來看。看過台上的節目再參觀下畫作，係時候入沙田到女麻女麻家。

回到女麻女麻家後時候不早，就轉到隔離邨的酒樓，然後接太女麻出來晚飯，是日太女麻和孻叔的農曆生日。

5月2日，媽媽的電腦用了接近六年終於壞了，修理無效後，第一次深入男人的樂園黃金商場買電腦，windows 7 64bits，i5 CPU，比舊的快了不少。不過用開barebone機，再換回ATX，枱面和走線要重新安排過。因為windows 7不再提供outlook express類的pop mail程式，因此新機安裝後都接到有用家投訴。

以下左圖是2008年5月影的，右邊是2011年5月，一套衫著三年，抵呀！

某日，學校工作紙的題目是heavy vs light，慶幸家中也有天秤，睇住做係會明白d o既！

星期日去荔枝角公園玩，打大仔韆鞦是必然的。不過當日天氣非常熱，還是去嶺南之風餵雀仔和魚吧！

又玩光影效果了，今次躲在房內開冷氣，感覺良好，而效果都不錯呢！

在上月復活節假期前，學校派了某牛奶品牌的環保牛奶盒設計比賽參加表格和空白的牛奶盒一個，是自願參加。有人要參加，咁唯有又黎啟動親子設計時間，除了基本材料的牛奶盒外，爸爸用了見到都唔多高興的稅單信封，仲有隨生日蛋榚附送的蠟燭托，還有少許手工材料一起製作。主題經商議後是溫室一個，完成品是以下的模樣。

做完手工，可以星期日落街玩下，今朝撞到音樂班的同學晉禮，原來佢係朗朗的幼稚園同學，真巧合。另一巧合係未知道朗朗跟晉禮係同學之前，爸爸和朗朗爸分別說有同學仔有興趣一起參加即將報名的暑期泳班，點知.....就係咁o岩，大家搵的就是晉禮，咁就簡單啦，即刻齊人報名去。而2月補買花苗回來種的「影武者」大岩桐開花了！

大岩桐的第一棵開出的花，是粉紅色的，另外還有些小花蕾，期待！由於要準備學游水，某夜在屋企樓下商場新開的運動用品店買了泳鏡，而爸爸亦買了波鞋泳褲等，遲下可以去沙灘玩。

早幾星期前在沙田City Super買的朱古力曲奇粉一直未有時間整，終於找到時間動工了！曲奇粉、雞蛋、水、油.....不過出黎個質感麻麻，焗得亦不算好看，但最算還吃得落肚的。

「影武者」大岩桐除了粉紅花外，另一盤亦長出了花，這一棵是紫色的，很不錯！而由於報了泳班的關係，有人有時沖涼的時候，係會用浮板在放了水的浴缸入面「游」的......

5月21日，爸媽的結婚週年紀念了，一個蛋榚的出現，對於小朋友來說，還是點蠟燭，許願，吹.....與生日蛋榚無異的。中間張相，唔記得做咩黎，但燈光效果配合得...好正！右邊的是上Lego班的情況，排隊、探熱、消毒雙手、貼名牌，拜拜爸爸媽媽，然後每個小朋友都頭也不回進課室去，魅力何在，只有小朋友才知吧！

潮流興chok樣，先黎左邊一個，再黎個嘆梳化睇電視look，先後再黎個扮表演魔術look，最後黎個唔知點解影到咁chok的手信look (台灣Suntory promotion的Nachan購物袋，由大姨係台灣灌左三枝飲品一肚水才變到返黎香港的，間接鳴謝杏子姨，唔係佢係blog介紹都唔知果一期有promotion)。

5月學校的其中一個主題是幫助我們的人，來來去去都係警察、消防員、醫生、護士、郵差果d。其中一個手工是做了一頂護士帽。某次學校的家長活動，老師說有些同學仔分不清，吹水媽媽是護士(雖然學校全部職業都教哂有男同女的)，有人堅稱「我媽媽才是護士」。老師說：「對呀！」，咁又真係知道架喎！

星期日如遇上媽媽返工，兩父子有何好去處呢？就係返沙田探女麻女麻和去老人宿舍探太女麻。今次遇上太女麻去了活動室參加活動，唯有係太女麻個床位等待下。呢一代小朋友等人時有咩做，咪又係iphone囉！由於宿舍四點半就準備吃晚飯，所以等太女麻回來坐多幾個字又夠鐘。今次有人用相機拍下了在他角度下的太女麻啊！

42個月

2011-05-30T03:02:00.000+08:00

2011年5月28日，3歲半啦！還有不足兩個月，K1的課程就完結，小休三星期的暑假，就到K2了。早前在度高磅重的數字係95.7cm和14.4kg，即係由開blog至今，高度已上升接近一倍了，不過呢，就仲未夠資格要買八達窿坐港鐵 : P

最近，跟爸爸分享學校生活(因為學校手冊有每周評分的項目，老師評一些，家長又評一些，其中一項就是分享學校生活)，爸爸問：「Who's the no.1 naughty boy in K1C？」

Jin：「Duncan！」

爸：「Who's no.2？」

Jin：「ToTo！」

爸：「Who's no.3？」

Jin：「Brian！」

爸：「No.4？」

Jin：「我~~！」

(點解要轉台用英文問，事關有人用廣東話問唔啋人囉！)

41個月

2011-05-27T22:52:00.000+08:00

咩叫惡人，呢d樣咪係囉！3歲5個月，已經去到9xcm高，沖完涼企返係浴室個枱度著衫，已經高過爸爸個頭了。

4月份計落放假的日子比返學的日子多，學費也不會收多，但當然不會收少。這個月有表弟、三姨、爸爸和契妹希兒生日，所以節目亦多。

下個月呢，將會係3.5歲啦！

2011年4月份總結

2011-05-27T00:56:00.000+08:00

追呀追，趕呀趕，5月未完前先趕埋4月份的綜合報告先！4月1號無比人愚弄，4月2號興趣班放學後就帶埋生日禮物去了表弟家替他預祝生日。表兄弟倆見面何等熱情！一人中路欲攬，另一人上路擒眼鏡，好不熱情！唱生日歌食蛋糕，還有朱古力復活蛋，yummy yummy！

平日有人成日乘機走入廚房，倒不如就叫佢自己洗野啦！玩得攰，有時死都唔願訓，硬頸呀o拿，通常倒頭來拍幾下就訓得著。除左訓得正正常常，裝奶粉的紙盒也有時會變做床，但都係玩多過訓喇！

某日，有人求助要拎返d碌左入電視櫃底的玩具，點知奸乍的人玩人疊人，30幾磅喇，扁啦喂！星期六的下午，無論病病地定眼訓，都一定堅持醒神地去油麻地上Lego班。4月10日星期日，爸爸生日，但難得契媽放假，於是又再去錦田玩玩是也！是日主菜，放風箏；甜點，摘水尾士多啤梨。

先在錦上路跳蚤市場買了風箏，然後坐的士入去。契爺爺媽放風箏，玩得不亦樂乎，零經驗的爸爸也難得將風箏也成功升空，不過玩得一陣，小朋友夾開哂去執樹枝。玩左一大餐，去食野先。

除了豆腐花，仲有香腸魚蛋燒賣公仔麵&可樂，食飽再逼兩個男孩子叉一叉電，以免臨走先黎無電。叉左陣電，再回歸士多啤梨田。難得的是比上次的多了可以摘的果實，但味道呢，可能水尾啦，比較淡而且一洗要即食，洗完即"林"哂咁。

摘完士多啤梨都快5點，時候不早食多個甜筒就走人。是日晚飯係元朗大榮華，飛的從錦田直接過去，5:45已人山人海。一場來到，當然等位是也，等呀等，卒之等到7:00，原因係有某團體佔了一邊場。雖然等成個幾鐘，但慶興佢地食得早散得早，係等位期間上facebook打咭，各方好友菜式情報如雪花飄來，可惜席間無人食"姨丈"，五味雞、釀鯪魚、豬油撈飯再加上幾個小朋友餸，最滿足係甜品馬拉榚和鴛鴦水晶包。因為初次到訪，食食下先發現只許現金埋單，契爺和爸爸分別借尿遁提款，點知就係爸爸遁果次，比契爺乘機埋單，真係多謝哂！

翌日，吃得太飽變成打包的水晶包再翻蒸，一樣好滋味！繼311大地震後，災前正常補貨變成災後三催四請才送到的一箱八罐奶粉，正面臨短期內要戒奶粉的決擇下，媽媽找到某網店開售災前生產的奶粉，仲訂到兩箱。這前後三箱的奶粉，將會係未來幾個月食糧，之後就真係要戒啦！而之前補買的大岩桐替身，花蕾出來了！另外，夏天將至，執了泳裝出來，有人竟要穿著泳裝沖涼，啤~

4月17日，跟婆婆、大姨等去飲茶，食野的人多了，枱面有些點心叫兩籠都快掃光，好在表弟還是有得睇同最多食少少，日後可能要去到叫三籠才夠吃。接著，是悠長的復活節假期，除了做學校的暑期習作，仲有自己閒時畫下畫下咁囉！

時間過得真快，第二個Lego course都完了，點知原來報夠三個會有cert.拎，而有人又話要再報(本來已買左盒Lego返黎諗住佢自己砌啦！)，於是再報了五月份的。隔了一段時間，又夠期去探視光師驗眼了。因為上次係乜大視光果度自選果副眼鏡被檢定為鏡框太大，於是今次在follow up的眼鏡店配了另一幅更型(即係更貴)的，加上散光度數上升(視光師說小朋友的散光會很飄忽)，換就換啦！而training一排過後，弱視眼已大大改善，剩下落黎係遠視和散光了。

4月22日，連大人也放復活節假了，早上去了陳守仁小學的開放日參觀，去到人山人海，玩了個遊戲就撞到校長(幼稚園果個)—「校長早晨！」看了一看銀樂隊的表演就登樓參觀，天台有小型哥球推桿場，另外仲有科學、普通話、英文、日文的展覽，操場仲有爆谷和綿花糖無料奉上。不過時候不早了，先去奧海城午飯，因為之後仲有約呢！

食飽坐港鐵去美孚，目的地荔枝角公園。本來今日約的組合是招風雨組，而天氣預報也是如此，點知凡事總有例外，今日就天氣良好啦！嘉駿哥哥和穎芝妹好，名晉、柏謙陸續出現，不過由於跟嘉駿哥哥和希希哥哥多見面，玩得會比較投入一點。晚上，大家到了我家作客。

繼續復活節假期，媽媽返工日，爸爸帶我去沙田探太女麻和女麻女麻，由禾輋玩到瀝源再玩到沙田中央公園再玩埋新城市Snoopy Town，仲要係上次無玩的獨木舟，即使講低左6:30返女麻女麻度食飯，都排到7點玩左先閃，不過有人好乖或者知衰，選擇唔再留係度玩個滑梯先，係即閃果隻。是晚晚飯，食完仲有蛋榚食，又有甜筒食，大滿足啦！不過堅持要坐港鐵唔坐巴士，點知行到半路因為無中間叉電訓到死豬咁，爸爸事後腰骨痛左幾日。

4月25日，約左婆婆去鳳凰新邨舊居拿點東西，出發前係屋企樓下商場的復活節攤位拿下了第二隻咪兔。雖然婆婆那裡的地磚跟太女麻舊居的一樣，但因為很細個時去過，印象都沒有了。而婆婆這裡的初次見面就很新鮮，還發現了地拖，扮下野抹地先！另外，仲初次試左咩叫不求人添！

同日，回到家，爸媽對於我長長的叮眼頭髮實在un頂able，於是去了剪頭髮。今趟不是Anson哥哥剪，因為放假了。換了另一位姐姐剪，而今次係第一次自己坐在車仔上剪而又無喊過o既！叻叻，事後獲贈吉吉島散錢機會一個。

4月30日，已兩年沒見的Daisy姨姨、Wendy姨姨和Miranda姨姨終於約齊來我家。闊別兩年，大家可以睇睇有幾大分別(2009年3月15日網誌)，峰峰哥哥一樣咁靚仔，怡雅哥哥、芹芹姐姐、琳琳姐姐都大過哂，今次仲多左峰峰哥哥o既妹妹。飯後，眾媽媽和小朋友一起借酒樓backdrop預祝母親節呢！

2011年3月份總結

2011-05-18T00:12:00.000+08:00

越來越遲的更新，哈！今次係2011年3月份的報告。因為都上學了，生活很規律啦，返學放學，上興趣班，在家玩玩具都是那個模樣。早前大整蠱的一人一花，脆弱的花苗已由兩個從花墟買回的替身頂上，生長狀況ok啦！

3月6日星期日，是日無所事事出街找節目，卒之一句士多啤梨，就去了錦田落田摘，味道不錯。

除了士多啤梨，仲有餵兔仔、電動車，當然還有在草地跑跑跑，不過今次因有人堅持獨樂樂，所以沒有call其他人。但玩到黃昏，既已去到元朗，就call了契媽約食飯，不過是日契媽要去飲，於是就同左契爺、希希哥哥還有希兒妹妹食晚飯。

星期日過後，又是返學放學，eyes training時段等等，當然仲包括食下零食。3月11日，是日約了大姨的老師楊老師出來晚飯，這天還跟楊老師上了契添！12日，出校巴的PN班同學仔Hayley邀請的生日會，地點是熟悉的Dream House，之前就在這上過play group啦！

幾個同校巴的同學仔，同班的有葉曦霖，PN班的健健、陳仲頤，一起玩玩食食，仲有姐姐表演魔術和造出不同花式的氣球添！

某天，本來是萬眾期待的學校活動參觀九龍公園，不過因為天氣關係延遲了。13日，在某人的悶悶不樂下，趁天氣好就安排自家參觀九龍公園吧！其實以前已經去過，那時在尖沙咀上幼潛放學都會去，不過有人o既記憶入面搵唔到呢個record，咁就趁機會去看看喇！進入九龍公園，竟然撞到名晉一家，可惜他已玩了很久要回家去。剛好兒童遊樂場更新了，一玩就玩了很久。時近黃昏，才離開去尖沙咀逛街shopping。

3月18日是學校的親子運動日，由於爸爸拿不到假期，只有媽媽陪我去，加上天氣不好，又冷又下雨，只能影到少少相。

311日本東北大地震前2天，剛好是奶粉正常補購，可惜天災，仲要係奶粉來源地出事，只好耐心等候已訂購的奶粉送來，應變計劃是從此戒奶亦已立即進行策劃。慶幸，3月18日奶粉花了一星期終於送到，可以延長多3-4個月才戒了！

20日，媽媽要返工，爸爸帶我去探太女麻和女麻女麻，還玩猜樓梯。回家前還在途經的Snoopy World玩，高高的滑梯玩得興起，一點也不驚。玩小滑梯還有女仔跟著一起玩添！

某晚，說了很久頭髮長拮眼睛也有人不願去剪髮，難得有人說爸爸幫我剪，於是拿出剪刀來修一下長長的髮蔭，剛剪完很ok的，但過了幾天，無故成為一個碗形......

27日，媽媽返工，爸爸帶了我去拜山，同行的還有姑姐、三叔三嬸和孻叔。這是第一次去拜山，在港鐵上，爸爸講解何謂拜山，出現了如下的對話：
爸：「而家帶你去拜爺爺，人老左就會死，死左就只剩返d骨頭架喇！而家爺爺d骨頭就放左係果度(骨灰龕)。」

溍：「咁爸爸你第二時係邊度死呀？」
爸：「.....我知就好囉！」
去到柴灣港鐵站等，有人興奮得轉來轉去，可惜天空下起小雨來，去到哥連臣角又可以好興奮咁自己行到上山，仲要擔住雨傘，可惜比我身驅龐大幾倍的孻叔，由於缺乏運動的原故，行得比我還慢...... 下山後，去了威利華餐廳食tea，個珍寶熱狗，嘩！入面係司華力腸黎架~

不經不覺又一人個月過去，體重現在是14KG！

40個月

2011-03-31T23:56:00.000+08:00

轉眼又一個月，這個月代言人係辦公時間以外開左6個會，總時數超過24小時，其中有唔少部份係因為小業主對抗地產霸權而浪費左o既，希望到我置業果年代唔使咁啦！

寒冷、溫暖、潮濕、乾燥，咩都出齊的三月，唔多唔少都有病下幫襯醫生。好耐無量度過的高度已達到94.5cm，重量暫維持14kg左右。

生活平凡是福，去年三月去過看梅變成賞櫻的東京，對我而言全無印象，不過日本地震、海嘯我也知道，只不知道甚麼是幅射，遙祝311地震的災民早日回復平凡的生活，爸爸也很想再帶我去日本旅行啊！

39個月

2011-03-23T00:07:00.000+08:00

3歲3個月，由K1上學期踏入下學期了！返學已經習慣哂，下學期開始每年有工作紙一張，而週末有有點線練習和習作等，可幸做功課一點難度也沒有，但吃一餐飯呢，就尚有很大改進空間。

冬去春來，容易病病，卒之都係要進貢多少給醫生，要多點休息啦！

2月下旬—眼睛訓練大作戰

2011-03-22T23:48:00.000+08:00

2月16日，以四眼仔姿態上學的第一天，據報放學後眼鏡片上充滿手指模，相信係同學們好奇所致，新鮮過後，再過一天已經沒有了！而訓練眼鏡亦到配好了，這是一邊透明一邊磨砂的，訓練眼睛多用較弱一邊看東西。每天帶10-20分鐘，然後還有驗眼看字環節，紀錄一下眼睛有沒有改善，下次見視光師時交功課。自從帶了眼鏡之後，出街有人問「咦，佢近視呀？睇得電視多，打得機多呀？」Sorry呀，呢個世界除了近視，還有遠視、老花、弱視好多種架嘛，況且，小朋友遠視係好正常的，只係度數高度再配合眼鏡就可以趁6-8歲前的眼部發育時期去改善情況喇。由於我驗先一步，身邊有幾個小朋友的爸媽之後都約了去驗眼，其實3歲起就可以去驗架喇！其實我戴眼鏡都幾型架，Alice姨姨來探我，我地眼鏡款式都幾似樣，型啦！

這個冬春交替，一時又暖，一時又好凍，某夜，拿出了很久沒有用的睡袋，還穿得下。不過呢，就點都無細個時著得咁鬆動啦！

2月中又到姐姐生日喇，今次係佢係我屋企切的第三個蛋糕，即係佢已經係第二張合約啦。今次爸爸買了個迷你魔鬼蛋榚回來，4個人食剛剛好，有人仲食到津津有味，滿口朱古力添！某日落去吉吉島的Moorry fantasy"fing錢"o既時候，撞到隻好似叫moo仔o既物體，難得合個照，半係"fing錢"o既bonus啦！而係呢個正月時份，吃得次數較多的食肆，還是Pizza Hut，無計啦，用iphone app order，20分鐘自取真係快過落去堂食或等佢送外賣，呢個期間限定花開富貴又幾好食。

某日，爸媽因事放假，除了送我上校車(除左開學果日，爸爸第一次送我上校車咋！無計啦，下午班，爸爸返工了，返學放學都無得湊)，他們還去了花墟買了大岩桐苗回家，另外還有些種子。晚上，好好安置了兩盆大岩桐苗 (之前學校係1月最凍果一期派的苗已經瓜左喇！而家一盆$12，買夠兩盆，多個後備嘛！開得花果d，查實都係賣$15一盆)，仲洒下草莓和牽牛花的種子，因為一盆，家下變左六盆出來。另外，爸媽還買了盞LED枱燈，咁做功課就可以光線更充足啦！

種落盆栽後，淋花的責任，久不久我都會負責o既！哈哈~~ 2月26日，Lego班的最後一堂，老師吩咐落記得帶相機同叫爸爸媽媽來，於是有人重覆又重覆提點提點。究竟Lego班有咩魅力呢？創意、有趣、新奇，上完堂有糖/餅派？唔使考究啦，下一班都報左囉！可惜，興奮開心過後，頭慶慶，發燒呀！雖然好想跟住上Miss葉的音樂堂，但一探38C，都係休息休息啦！幸好休息過後，晚上開條隧道出來捐來捐去都無問題囉！

2月上旬之農曆假期前後

2011-02-17T00:53:00.000+08:00

1月28日的課堂後，上學期就正式完結了，亦是農曆新年假期的開始。放假了，有有甚麼做呢？霸著爸爸的電腦上網？自己畫圖畫？落平台玩滑梯？當然還有為農曆新年貼揮春啦！

2月3日大年初一，是日拜年行程先去最近的三姨家跟表弟拜年，然後一起坐巴士去土瓜灣跟契太婆拜年。去契太婆家最大特色，就係無限量馬蹄榚、蘿蔔榚、年榚等等，全是自家工場製，另有私家契太婆製的潮州糖水。吃飽飽就去深水埗的表舅公家拜年，曾大病的表舅婆經過一番康復後，已健康了很多。然後是回沙田女麻女麻家吃晚飯。因太女麻去年起身體不好，往年會去大坑的太女麻家，今次就遷就太女麻所住的宿舍，去了女麻女麻地晚飯。三叔三嬸還有孻叔也一起吃，四代同堂啦！

年初二，早上約了兔女郎Gabby午飯。雖然成日都好似約了去Pizza Hut，但因為當日酒樓很多人，還是為方便去了Pizza Hut吃，那個賀年pizza很好吃！晚上去婆婆家吃開年飯，吃得很飽！

年初四，屋苑辛卯兔年醒獅獻瑞賀新春，爸爸獲邀出席，而我又獲爸爸邀請，不過人大左，反而怕，舊年仲係座頭對住隻醒獅採青都無問題，今年聽到係咚咚撐o既Lion Dance就「唔制」、「唔好」......吃過午飯，爸爸依時就座，有人只在外圍睇，睇睇下原來仲縮左入大堂。之但係呢，到左晚上出街，又有人呢拎住先兩年爸爸買的醒獅木偶落街表演一番。而今個農曆年家課習作的最後一頁呢，又正好係用不同物料製作醒獅面譜喎！

經過個幾星期，在年宵花市買回來的拖拖，因為無食野而顯得日漸消瘦，呆倚窗前，顯得有點blue呢！年初六，約了契媽契爺晚飯，他們從屯門過來一起到酒樓吃飯拜年。席上有鵝掌，有人吃得不亦樂乎，希希哥哥就掛著打機。席間，有人行過來跟契媽拜年，原來係希希哥哥o既同學仔桐桐姐姐都出左黎呢頭拜年晚飯。聽契媽爆料，希希哥哥係學校好受......女仔歡迎架，哈哈~~除了希希哥哥，仲有已經坐得好穩的十個月大希兒妹妹啦！

晚飯後仲收到契爺保管左兩個幾月的生日禮物，係組合模型呢！多謝哂！第二日，就到中期業績時間，根據爸媽的核數報告結果，暫時係有龐大的貿易逆差出現o既，建議發出盈利警告。有一樣野想驗好耐，但一直未有得閒攪，就係驗眼喇！健康院係兩歲之後，下一次o既約會就係4歲驗眼，不過係出面驗眼呢，3歲就可以做了。檢驗結果，雙眼都有遠視和散光，而且度數去到中等，需要配眼鏡做糾正，仲有左眼有類似惰眼的情況，要做訓練，否則將來視力可能只剩一半。訓練係點呢，就係蓋住右眼，盡量令左眼多活動。根據網上的資料，眼睛的發育大致到6-8歲才完成，遠視散光惰眼等等都可以盡早透過訓練和配戴眼睛而獲得大程度的改善的。

年初八，上學去；正月十一，約了契媽一家去洗姨姨家拜年，恆例呢個組合約出來的話天氣都會大致天雨o既，特別係去將軍澳打算去冼姨姨屋企o既機會目前達百分一百準係落雨o既(兩次統計的精密邏輯計算結果)。早上九龍及新界區均為微雨，即係遮都唔使用果隻，但到了約定時間呢，嘩啦嘩啦下雨喇，好大雨耶！今次唔理喇，搭車過去呢，點都要去硬闖從未打攪過o既嘉駿哥哥同穎芝妹妹o既屋企啦！去到有玩有食，又有嘉駿哥哥焗製的朱古力曲奇，又有大頭叔叔的住家湯和打邊爐，飯後仲有冼姨姨買的芒果布甸，yeah yeah yeah！成日約親都唔蒲頭的阿咩叔叔、咩姨姨，睇左唔好羨慕，唔黎唔覆call係果d係你地o既損失黎架！

2月15日，早前驗眼後配的眼鏡已有取，鏡框是自己選擇的黑白色框，第一日戴上很適應似的。由今天起，踏入了四眼的行列囉！

1月份總合報告

2011-02-01T00:29:00.000+08:00

新一年新突破，就係整一篇月結出來，算得上係開blog三年寫得少的其中一個月了！新年依始，去了剪個靚髮，今次坐車車剪，全程無喊(雖然有時睇落係含住泡眼淚咁)，但都堅持到最後。剪完除了糖果獎勵，仲有吉吉島玩玩，再去埋會所玩氣墊球。

閒時做下習作，「辦公的時候」又試過拎部netbook出黎「辦公」，腳痕o既時候叫媽媽來個包扎，雖然係無事無幹o既！試過拎Joanne姨姨送的聖誕禮物出來玩，但盒上標示對象年齡「15才」，都係開齋後收返埋喇。然後，無耐就病病地，謝謝地......

1月join左個新的興趣班，是砌lego的，一班十幾個小朋友，全男班砌得很開心。曾經有人問溍溍，如果要你選唔返一個興趣班，會係邊個？答案總沒有lego班的份兒。持續寒冷的某天，爸爸說不如打邊爐，還邀請了婆婆、大姨細姨一起打。相片的左上方，是從未打過邊爐的人，對這一餐邊爐的紀錄，用的是婆婆從工展會買來送他的白板。又某日，因爸爸一句口痕，於是勞師動眾拿了high chair出來給吃飯走來走去的人用，食完一餐又要收拾。今個月，家中最後一片大碼尿片用完，現在進入無片階段，不過唔係戒左片，係轉左用Big size尿褲。查實都係信心問題，夜晚暫未濕過片，但一齊訓的話，還是遲下先搏喇！

平日吃喝玩樂四大主題啦，不過當中亦有d分別o既，例如平日餐餐都仲要姐姐餵，但假日媽媽返工姐姐放假o既時候呢，同爸爸食都自己夾喇！有時，人係犯賤的，唔逼唔願做。學校早前響應某政府部門的推廣，每個學生派了一棵大岩桐，但天氣寒冷比一棵幼苗來，氣候完全錯錯錯......最近兩日，已經謝ing緊，唯有留待春暖時份去買另一棵來種喇！復活節後要交返學校啦！

畫圖畫興趣不錯，久不久拿出水彩來畫畫。有時又拿相機拍照，某日到沙田和女麻女麻，還有女麻女麻一邊的舅公、表叔、表姨、表姐上酒樓吃晚飯做節，飯後影相，有人搶著相機要負責拍照，死也不放手，好在事後發現都有一兩張相仲算見得下人。

周日跟爸媽去荔枝角公園玩，2-5歲的韆鞦已不是味兒，還是5-12歲那款沒兜的才好玩，飛啊~要飛到前面那棵樹上，有人邊玩邊如是說~~去完公園去了荔灣街市，第一次(有意識的)跟爸媽去街市，買菜、買肉、買魚，那裡買來的海鮮菇，一吃難忘。

某夜，有人示範究竟超過3歲，仍能否食腳指，原來還是可以的。大岩桐啊，前陣子你還是這模樣的，現在....我會遲下買過一棵代替的了。而年近歲晚，幫爸媽包利是，不過這些粗重東西還是爸媽做吧！而過去有兩星期，晚上邊吃提子或車厘子看《紅葉瀛風》，啦啦啦~啦啦啦啦啦~~已經懂得哼，不過爸媽還是接受不了chok樣chok聲的Ria.......

甚麼是矛躉王捉棋呢？例如玩鬥獸棋唔比人食佢d棋果d人囉！27號帶一枝年花回學校，爸爸專程係26號收工落花墟買，再加上媽媽口輕輕應承埋幫人買，卒之爸爸逼於無奈係花墟買了菊花和百合，還有一枝跟order買的不知叫甚麼的花，一粒粒橙紅色果子的。劍蘭嘛，原來是28號學校年宵活動模擬花市買來的，爸爸買的那枝比人搶購了，有人只買來一枝無咩誠意款o既開得謝謝地的劍蘭......作為上學期的最後一日，還派了上學期的成績表和農曆新年作業，還有一隻學校的CD，爸媽終於知道「禾攪數里、禾攪數里....」原來校歌係咁唱O既！29號，是繼街市體驗後另一event，只此一間九龍城貴嶼和記隆，買賀年食品的婆婆指示店，買完仲宅配到婆婆家，今年仲買左清心丸和桃粿去婆婆家試食。

Lego班究竟有幾好玩呢？家長無得陪真係完全唔知道，入班房時頭也不回，上堂期間V嘩鬼叫，放學必定有糖果/餅，然後一張今日砌過咩的note，吸引之處究竟係邊part呢？係婆婆家有人有樣學樣扮拖地，的確有點有型有款，但係實際還是欠奉的。

家住荔枝角數年，還是第一次去距離最近的年宵，就係長沙灣年宵，連爸媽也是第一次去，不過一眼望盡，比啟德的還是很多似的。話說有人在落場時已在商場見人牽著兩隻兔仔氣球，跟住知道年宵會有得賣，於是去到都沒有心看其他，全力找兔仔去，卒之，真係行到最後一檔，兔仔呀！姐姐說$48一隻呀，雖然爸爸心想的確有點貴，但第一次行年宵，豪一豪喇！由於出動到天真小童問價，隨兔仔仲免費附送價錢$2的星星牌仔，同時買埋個價值$22的風車，優惠價只需$20。

逛完年宵，是時候到婆婆家做節，過去坐開的BB椅，今次交給表弟坐喇，而溍溍還是吃大人餸，表弟暫時無份囉！有人替兔仔改了個名叫"拖拖"，可能係有人開心到不斷拖住佢跑來跑去吧！

38個月

2011-01-31T22:07:00.000+08:00

3歲零兩個月，又係即將到農曆新年的時候了！

同時，亦係K1生涯的上學期完結時，放完假就係下學期喇！

係流感傷風等病菌再加上天氣冷的1月之中，小病一場，

休息左幾日無返學，現在已經精神爽利。

現在身高94cm，很多衫都是1歲左右買的，

第三年了還是穿得落，不過應該來年要買新衫了。

聖誕假期(下)

2011-01-05T00:31:00.000+08:00

聖誕紅日假完結後，大人都要返工，好在大姨地都係放聖誕假，於是除了夜晚同爸爸玩Thomas外，日頭會有婆婆、大姨細姨地過黎同我玩。有一日，大姨係我唔知o既時候走左，我呢個老師，唯有用手提遙距授課啦！

因為天氣冷留係屋企，但都會去下公園放下電咁啦。仲有，偶爾難得的自己捧住個碗食野咁啦！

上次同爸爸去吉豬島買了副大啤牌，因為大張對我黎講好難拎，突然醒起坐JAL時都有副啤牌，於是搵返出黎玩，細細張，o岩哂手形啦，玩的，當然還是"潛"烏龜啦！

1月2日趁返學前的一天，就去剪一剪個靚髮。今次好乖，自己坐係同區小朋友至愛的車車剪髮椅上理哂成個髮都無喊，於是爸媽獎了去吉豬島玩，又食麥當當(查實佢地想食)，然後又去埋會所玩，仲第一次玩會所的氣墊球添！(吉豬島都有，但要比錢，會所唔使，但就要搵爸爸對大脾墊下腳先夠高喇！)

後話：話說1月1日電視播春田花花同學會電影，同日爸媽又再拿家下的影碟出來再看，兩日後，有人係沖涼時在浴盆中捧住個面盆問：「爸爸呀，大學有無教捧住野架？」對於未讀過大學的爸爸當然唔識答喇！但回頭一想，莫非.......阿囝，你真係香港人黎架！

48cm 三週年

2011-01-01T00:21:00.000+08:00

進入2011年1月1日，48cm三週年啦！

開blog三年，小凱溍已經3歲，是幼稚園K1生了！
呢個時候又係業績時間，2010年內寫了120篇blog和兩個遊記。

瀏覽人次由26113，上升到36089。

身高的增長由85cm，上升至約92.5cm。

謹祝各位新年快樂，身體健康！

37個月

2010-12-30T00:01:00.000+08:00

2010年12月28日，已經3歲零1個月，相對於大3年和1.5年的嘉駿和希希，當然仲有一段距離。追波的時候總是跑得最慢(細個嘛！)，不過已經夠班玩埋一齊了！

學習仍然繼續進行中，對於學校生活處於熱愛的心態，做聖誕作業更加是渴求的境界，過多幾年都係咁就好喇！

近期而言，沒甚大變化，最多是飲食方面，對於正餐越來越掛住玩，而吃零食反而更有興趣。

快進入2011年，祝所有小朋友都健健康康，快高長大！

聖誕假期(上)

2010-12-29T21:45:00.000+08:00

2010年12月，從22日起是學校的聖誕假期。假期有咩做呢，攪攪震囉！例如扮下聖誕老人，Jinko再現，又或者玩Playhouse(但已經差不多頂到屋頂了)。仲有，沖涼時同爸爸玩相機影effect咁喇！

25日恆例婆婆生日，今年準備了一張自製生日咭。當晚去了黃大仙吃晚飯，天寒地凍，不過吃過飽飽，當然仲有patpat包(即係壽包喇！)。

26日去了探女麻女麻和太女麻，不過4點幾去到老人宿舍，太女麻已經準備吃晚飯了。在飯堂內不便打攪太耐，寒暄幾句便離開了。在離開前，爸爸將送給太女麻的餅乾和蛋榚放回太女麻的床位上，溍溍跟著跑來，然後說「我會照顧你架！」，唉~幾廿年唔知仲有無記得講過呢一句。晚上吃了一餐麥當當，兩個魚柳包的芝士，加埋才等於一片，變相加價老土到暈。

27日，約了契媽和冼姨姨兩家人一起去錦田鄉村俱樂部摘士多卑梨兼BBQ去。已經第二次來，駕輕就熟了。今次雖然天氣凍，但無咩風加上有陽光，反而仲舒服，仲打破左過去幾次約親契媽和冼姨姨便壞天氣的慣例添！入到去，好快就見到羊媽媽和羊仔，羊仔仲無綁起，大家都追住黎餵佢添！餵完羊仔，然後就餵兔仔，有人之後話玩得最開心係餵兔仔喎！跟著去重頭戲摘士多卑梨，日本種每磅$90，法國種每磅$60，講香味和甜味，還是日本種的優勝，但價錢呢，真係貴左囉！

兩款加埋摘左$100蚊，留來晚上去另一場合時吃。午飯時間，BBQ是也，大人每位$98，小童(高過90cm，矮過140cm)$78，包一罐汽水。燒野食呢d粗重野，梗係d爸爸做喇，小朋友呢，爐都未起就標左出去玩喇。呢度好處係BBQ場四通八達，前面有一大幅草地，可以踢波、放風箏，齋run都夠哂d小朋友放電喇！

而家得嘉駿哥哥、希希哥哥和溍溍跑跑跑，過多幾年，嘉駿哥哥同希希哥哥的妹妹都大左，5個人加埋應該跑得勁喪。

日落黃昏，係時候由大西北往東面出發，目的地將軍澳。從錦上路去，轉了三轉車，個幾鐘後終於到達。在Stanley哥哥家的party，溍溍就變了最大個的男孩，亮仔和爾澄都比他年紀小。不過呢，係度收的禮物多到大大個環保袋都裝唔哂。

這個聖誕節收了不少禮物，在此多謝各位姨姨叔叔、姐姐哥哥，聖誕快樂！

週末

2010-12-20T03:12:00.000+08:00

2010年12月18日，經過了幾天很寒冷的日子，今天星期六是婆婆那邊做冬的晚飯。表弟下午來了我家，因為晚上在我家附近的酒樓吃冬節飯。每逢大時大節，酒樓吃的都是套餐，乏善可陳，但這個表哥呢，由表弟下午來了之後，搶著換片開奶，忙得很.....

自己吃飽了，還跑去逗表弟玩，不過有人自己唱哂歌拍哂手，可惜表弟未識聽嘛！

12月19日星期天，媽媽要返工，一起吃完午飯，爸爸帶了我去荔枝角公園打韆鞦。有人現在已不玩那些給bb玩的兜形韆鞦，而去玩5-12歲小朋友的那一款，還說要盪高d，要盪到前面的樹木上去......

韆鞦過後，有人話好急呀！好急呀！去到表演台那邊的洗手間，原來今天是荔枝角公園同樂日，還有兩個姐姐在台上唱歌，聽了長腿叔叔和we wish you a merry christmas後，台上的姐姐唱了首很嘈吵的歌時，有人便說了要！去了嶺南之風看龜看魚看雀仔看cosplayer看人影畢業照結婚照後，有人說要去嘉心幼兒園調查下，於是從美孚的一邊行到去另一邊看。重遊舊地(都唔夠半年)，有人問，點解今日唔開o既？

回家前有人去玩那些書局門外$1遊戲，又比佢中左件小玩具回來。回到家中仲要玩飛行棋，這是婆婆昨天送的聖誕禮物之一，真係盲拳打死老師傅，有人嬴到開巷(輸家只有一隻飛機返鄉下而已)。然後在這黃昏時份，有兩父子一覺訓到八點幾才落街吃飯。卒之，今晚有人訓覺的時候，已經踏進另一天了！

聖誕表演

2010-12-16T23:46:00.000+08:00

2010年12月16日，學校的聖誕表演，不過只限K1C班。學校在聖誕前安排了各班進行表演，觀眾就係果一班O既家長，大家都唔同日子的，今日就輪到我那班了。表演舉行時間係下午2點，好多爸媽或者婆婆女麻女麻都出現(每個小朋友只限2個家長)。

爸媽下午1點40分就到校門外，但要等到2點才可進入。等候期間已隱約聽到有d聲音，2點開門，入到去成班K1C小朋友已經變成聖誕小朋友，爸爸相機都未拎得切就已經表演開始喇！一中一英兩首聖誕歌曲，好快就唱完，大合照後再各自拍影，然後就回到上課時間，爸媽們又要離開了。

忽忙過後，爸媽去吃個遲吃的午飯才有空睇返相片和影片，估唔到有人d表演動作，與嘉心幼兒園的表演動作雷同呢！

係之前拍照的期間，爸爸仲專登係班房影底蘋果枱d小朋友名，以便返屋企時可以對證下有人講佢隔離左右d小朋友o既野時，可以清楚d。

溍：「聖誕快樂喇各位！」

傻左~

2010-12-15T19:47:00.000+08:00

[本報訊] 昨日(12月14日)下午，一名3歲梁姓小朋友懷疑在停候校車期間，與一名年幼1個月的PNX班小妹妹玩耍時，被扭頸及抓傷，左邊面部有兩條抓痕，無需敷藥後回家。

有關負責人初得悉事件係由另一同校車高班女學長在屋企樓下商場從後而大叫所揭發的。該名高班女學長與母親同行期間，突然從後大叫「梁X溍」，然後告知其母親「佢比人打喎！」而被揭發事件。及後某人的蜜糖老師亦曾致電及電郵告知事件始末。

唯當事人拒絕評論事件，亦不肯合作進行網上相片認人手續，只供稱疑兇為陳姓小妹妹。經負責人檢查後，發現並無大礙，相信屬小朋友之間嬉戲時過度興奮所致。但檢查過程中，有人只懂伸脷，拒絕交代事件真相，故此暫列作懷疑狂犬症發作......哈哈哈~~

12月生活瑣事+5仔會面

2010-12-13T02:51:00.000+08:00

2010年12月第二個星期，除了星期三病病，幸好即看醫生，休息了一天，第二天已可在"堅持"下返學去。不過出院無耐的太女麻就唔乖，剛星期六又入了醫院了。之但係今次o既"唔乖"之中都"好乖"，因為係自己覺得唔舒服就出聲，唔係上次真係"唔出聲"喇！

返學以外，都係攪攪震時間喇，例如玩生日禮物之一的Scrabble啦，拎返幼兒園表演o既沙鎚出黎rehersal黎緊幼稚園的聖誕表演啦！仲有星期六的音樂班升班了，今次除了街坊陶陶外，仲有當年(都係年頭o者)幼兒園蘋果組的悠悠一齊上，當然仲唔少得至愛之一的Miss Yip啦！

12號星期日，有BBQ約會，不過因為氣管才剛好了下來，還是對燒烤敬而遠之吧！不過難得的多仔聚會，總要出一出來吧！今次地點去了九龍城某新樓盤，5樓平台的燒烤地點外有些露天的位置可供小朋友跑跑跑，背景仲好春田花花幼稚園feel添！

在戶外梳化上，難得集合了五仔，不過b朗比較唔合作，但細佬哲朗就好合作，仲學曉yeah yeah yeah，V手影相都不知幾落力(雖然學唔到食指+中指)，但佢都出到大姆指+食指黎V架！不停咁影，但真係無幾多張係正正經經五個樣都睇得真，一於"晒冷"喇！

最後呢張影得4個企得最似樣，可惜b朗角度加少少"唔合作"問題，都睇到一隻眼一個鼻...... 你地又搵唔搵到佢呢？ :p

探女麻女麻與太女麻

2010-12-07T21:30:00.000+08:00

2010年12月5日(星期日)，延續昨日的school picnic熱情，早上起來再次鋪起野餐布在廳中早餐。

然後就坐巴士到沙田探女麻女麻，睇完女麻女麻後就去老人宿舍探上月入了三星期醫院的太女麻。太女麻住醫院時畫給她的蛋榚圖畫也拿了回宿舍，但要求一起合照，就有人扭扭擰擰喇！

今天(12月7日)，天氣轉冷喇，大家要好好保重身體呀！

是菇霹靂

2010-12-06T14:45:00.000+08:00

2010年12月4日(星期六)，第一次在學生涯的"是菇霹靂"(school picnic)，為隆重其事，再加上學校張報名表有6格，於是123456，邀請埋平日黎照顧我o既婆婆，仲有大姨細姨一齊去旅行啦！

旅行地點是馬灣的挪亞方舟，早上9時集合，但因為場面浩大(有成17架旅遊巴)，於是出發都成10:05，超哂時間。15分鐘後到達即入場去運動場集合，因為有好多野都有預約或者已經分組別要進行，原定早上的體操時間都要改動。K1C班和K1A班同為Group C，除了體育館，連班相都要改到下午，第一站先趕去玩跨越奇園。

估唔到近期由好多唔驚o既野變成好驚o既溍溍，玩完平行木和車軚後，仲跟大隊去玩繩網添！仲要玩到上去都仲保持到一絲興奮，不過，都不及最後落黎果幾步，如小蜜蜂見到蜜糖一樣，竟然有Miss Anita扶佢行出黎，嘩~~~~玩了10-15分鐘繩網，又係要追返schedule時間，跟住係方舟生命教育館。查實出出入入，一上一落都幾花時間，去到入場又成堆人係度，最緊要又係舊年去到爸爸都嘈o既去呢度果度又要o都飛，超煩的出入安排仲係無改善到。

入到方舟生命教育館，除了玩畫黑板外，有人仲肯畫面添，之前萬聖節舞會都唔肯的。然後入去整埋個毛巾蛋糕出黎，又到趕去樓上的珍愛地球館喇。趁個房玩，當然唔夠時間，跳住玩，都係剛好去到盡頭又未U turn，已經叫咪要集合由運動場午餐了。

叫午餐，因為無飯，所以不能叫"午飯"。是日午餐是一包飲品加雞肉三文治加蘋果。好在自己都帶左d野食去，仲有係東京買的Rody地墊初次出動添。

由於坐係運動場最後位置，前面開咪講的東西，查實都聽不清楚。突然音樂響起，原來係早上未做的運動時間。小朋友分成兩堆，跟在看台迎面站著的教職員做運動，音樂+運動果然係挑起小朋友們條根，個個都跳到好投入。連遲來的溍溍都跟著節奏地忘我演出。

開心過後，又到拚搏之時。途經小食亭，原來都有d野食賣，咖哩魚蛋和魚肉燒賣都係$10六粒，棉花糖和爆谷都係$20，之前係網上找了很久都沒有這小食亭的資料，唔通因為係貴，所以無人幫襯過？食過上星期的海洋公園，相比之下，呢個都算係"平"囉！

去到閘口，先抽時間來個"拍攝班相"，但場面混亂，一來同學仔們前後腳到達，二來個個都掛住影自己個仔女，d相機隊到埋一埋。混亂中，手持28mm鏡頭的爸爸發火，係一班大機細機家長之中怒吼了一句：「大家企後d影得唔得，唔覺大家部相機都係超wide angle喎！」然後，才有幾個同學的爸媽略為碎步行後左dd。

Group C下午行程較好，因為只係入方舟多媒體博覽館和方舟花園，仲難得兩個影院都入哂，婆婆需要未睇都有d驚，但都好過有人入親都扭計，但"企"落睇又無事(方舟故事那個只佔到企位)。然後仲有點點時間係方舟花園上層童了個圈。不過呢，有隻小蜜蜂就催住人走，唔比人影多幾張相留念。原來，前面有"蜜糖"出現~~

回到運動場集中，由於係包尾的17號車，等了一輪才能上車。上面果位哥哥，幾辛苦先叫到佢借個17號牌黎影張相，不過佢堅持要一齊影先得。好在爸爸用相機引左佢影第二度，先比媽媽同我影到一張自己拎住17號的牌o既相片。

回到學校散隊，因為要仲有親子音樂班最後一堂要上，於是爸媽抱著未訓晏覺得人行去搭最唔順路的巴士，等有人可以訓返一陣。卒之大半個鐘後先返到屋企，有人就醒左喇。休息多一陣，又係時候落去上Miss Yip的第二期親子音樂班最後一堂了！

同學仔濤濤是街坊，佢整親手要打石膏，加上佢又比較靜，所以影得我好曳，哈哈！今堂Miss Yip仲送左胡迪同巴斯的糖比我地食，仲影左好多段片添。下星期會上新一期的音樂班，今次仲會有街坊兼嘉心同學悠悠添！

與Gabby晚飯

2010-12-01T23:15:00.000+08:00

2010年12月1日，雖然已經過左11月，即係大家都已經係3歲，過左生日幾日，不過大家都節目繁忙，所以book期book到今日。今晚去左奧海城晚飯，好過係屋企果頭食來食去果幾間。

交換完禮物之後，開飯喇！由於時候不早，所以都肚仔餓啦，吃飯喇！

食飽仲去左冒險樂園玩左一陣，然後才返屋企。多謝Gabby的禮物，同場加返上次漏影的Ocean park海獅公仔Ali。

36個月

2010-12-01T00:57:00.001+08:00

又一個11月28號，今次係3歲喇！真係話咁快就到！在此祝早一天生日的Gabby，還有同一天生日的陳穎瑜，還有計香港時間都係28號的Michael仔(安叔叔的bb，在加拿大時間27號下午5:30出世了！)，真係好日子。

最近一次量度，身高92.1cm，體重13.8kg，真係好重，出街抱得爸媽手痛。學習方面，說話能力很強，形容、對比運用得很好，對phonics亦很有興趣，甚至會自己去拼音。不過，原來trouble two之後，trouble three仲麻煩。本來玩開的平台花園的滑梯，突然不敢爬到高那一邊、去公園玩大型的組合，架上的鐵板是硬身的，因為見有窿就連站起身來也不敢、在學校玩平行木，還要是離地只幾吋的都不敢；但去玩小童的韆鞦(即不是有個兜果種)，又完全沒問題，還叫著大力d，高d........ 唔通就係無意識期和有意識期的重大分別？

此外，最trouble的，就係久不久發脾四，又或者每天訓醒黃昏覺就係度喊，唔知為咩？但點都要喊一輪，然後咩事都無。

前排執拾冬天的衣服，特別騰空了一格衣櫃給溍溍，等他自己學掛衫，還有去完街時收拾他的背囊。但有人呢，就以爬出爬入個衣櫃為樂。

今年生收到唔少禮物，仲有婆婆和女麻女麻的利是，多謝哂大家！

海洋公園

2010-12-01T00:19:00.000+08:00

2010年11月28日(星期日)，繼上星期日去迪士尼之後，今個星期日仲要係生日正日，選了去有生日免費的海洋公園，這次亦是第二次去了，對上一次是2009年6月2日，媽媽生日時去的(http://lhc1128.blogspot.com/2009/06/12.html)。今次還約埋冼姨姨同嘉駿哥哥一起去，所以早點出發，一早起身，先落大家樂食早餐，然後去坐171去。今日路路暢通，半個鐘多點就到達香港仔，係巴士上攪好耐先訓著的人，仍然訓緊覺。去到正門，點知冼姨姨地去左大樹灣，由於接駁巴士時間很差，於是選擇了我們飛的士過去，爭取玩的時間，特別是趕上11:30的海洋劇場。

去到大樹灣，立即去換了一張生日免費飛。查實3歲小朋友基本上可以扮唔夠三歲照免費入場，但今日生日，於是換左張第一次大個仔要買飛但因為生日而免費的飛當作紀念。張飛背後有寫住"happy birthday"。入場時閘位姐姐見到，仲同溍溍講生日快樂添！但好似迪士尼咁多個章呢，就無喇！(但果邊生日都要比入場費囉！)

入場後，以海洋劇場為目標，不停上扶手電梯，趕在11:15到達，等候15分鐘就有show睇！不過今日很晒，好在有帶帽去。冼姨姨還有了香腸給兩個小朋友吃。11:30表演開始，有海獅和海豚表演，仲有例牌有訓練員扮觀眾跌落水表演......

然後去了嘉駿哥哥指定要玩的遙控船，我第一次見到，都玩埋一份。跟住到趕去下一場，就係去太平洋海岸看"人家"餵海獅時間($25三條多春魚，好貴呀！加上上次玩過，今次睇人喇！)

差不多下午1時，要吃飯了！今次取道上次未曾有的海底列車，幾分鐘就回到山下，去大熊貓餐廳吃午飯。

人不算多，但還是要等位。點知有位之後，入去一睇，原來同快餐都無咩分別，仲要自助去買食物，早知食小食亭食快餐好過入餐廳都係食快餐咁。食物價錢天價，左面是嘉駿哥哥地的午餐，承惠$192，右面是溍溍一家三口的，承惠$225。枝裝汽水$28，連出面汽水機的變冰可樂才$11，這裡一枝頂到2.5枝了。食到有人"痴"牙的叉雞飯，$88送迷你雪榚杯。同一個燒臘飯，在山上的小食亭，套餐和單點是$72和$55，分別只在這裡是用碟盛飯和送多杯雪榚而已。

吃飯後本想去玩汽球，但多人排隊，又因風力問題，每次只能載6-8人，真係等天光。於是去了玩騎魚魚(即係騎木馬的海洋版)，點知有人排到去玩時，突然喊哂口話唔用，但玩時又ok喎，但玩後影左相就想打人咁。

又見時間差不多，就去坐纜車上返山，去看魚魚去。兩個小朋友，每遇到纜車過接駁位震動時，就配哂音"更更更更....."，真係激死。又回到山上，先去下洗手間，然後就去看水母。有人見人影相，自己又要拎部細相機去影一餐。

看完水母，到去看中華鱘，感覺沒甚睇睇，好快就睇完，然後去海洋館。海洋館裡，祖國團友熙來攘往，但好明顯是一批一批的。因為有人叫眼訓要飲奶，於是企埋一邊等人飲完奶訓先再前行。就係因為咁，清了那一批團友後，已經不再會有明明大把位都推推貢，應該清靜點賞魚但嘈過街市的情況，可以慢慢逛。

出來了已時近黃昏，因為有人訓左，於是打算玩摩天輪的機會，就交哂比嘉駿哥哥了。

今日日落個太陽很圓，而且天氣不錯。嘉駿哥哥和他媽媽在摩天輪上看，爸爸就在地面上換上長鏡去拍照。

再次乘海底列車回山下，時候都不早了。天也黑了，於是決定行埋大熊貓樂園就離開了。因為時間已經很晚，遊人很少，而安安又正在開餐，真係任影唔嬲，但佳佳就在很早的位置訓覺。

看完大熊貓出來，只差幾分鐘，就到溍溍在3年前出世的那一分鐘，趕緊跑到外面，見到旁邊有大熊貓的扭蛋corner，找冼姨姨幫忙拍個紀念照，咁就過左三年喇！

最後，買了點小禮物就離開，回到屋企附近的pizza hut吃晚飯，過了一個盡興的生日啊~

第15代banner - 3歲生日特別巨大版登場

2010-11-29T09:06:00.001+08:00

第15代banner黎喇，為慶祝3歲生日，整了個特別巨大版出來，
而常用的"a hoi chun's blog"字眼亦將改成為"a jin's blog"，
以配合那個集合中英日三個語言而改出來的"英文名"。

(2010.11.28~ )

生日週

2010-11-27T23:57:00.000+08:00

自從學校的生日會在11月19日舉行，溍溍的生日週亦開始了。11月20號慶祝細姨畢業的晚飯，有人要求要有朱古力蛋糕，呢個要求，梗係有人幫佢達成喇！於是在酒樓吃完晚飯，仲有個蛋榚食。食完去了附近的鳳德公園影相，有人大膽地玩單槓，仲要抱住表弟影相，不過一睇表弟個樣，雖然佢未識講野，個心都應該諗緊「老表，抱實咪放手呀你！」

21號去了迪士尼，然後就是一連幾天返學的日子。閒日最愛將學校搬回家，近期課程係Noisey Nick，學生除了爸媽、婆婆大細姨外，仲有bb、多拉A夢、Anna、Alice、Barney、老虎仔同埋最新入學的巴斯光年。

11月23號係返學以來的第一次outing，主題係去學校附近的奧海城Taste超市買東西。每人有五蚊(當然爸媽比)去買野，溍溍就買了個編號4388o既新奇士橙回來，承惠$3.6。

11月24號係溍溍的農曆生日，先兩年爸媽都忘記了，今年爸爸記得，於是收工去了酒家買了壽包和白免仔回來。有人以為壽包同蛋榚一樣，堅持要點蠟燭、關燈唱生日歌，當然仲有許願，然後........切patpat時間，的而且確，有人係咁講o既！是日飯後甜品，編號4388出黎為大家o既健康而犧牲了！搣開4388時，入面都有好多粒核，爸爸對溍溍說，如果食左d核落肚呢，會點呢？正當爸爸諗住傳統的標準答案將會係呢張小咀巴而出o既時候，有人回答說，咁個人咪變左樹囉！(咩標準答案唔係頭頂生棵樹出黎咩？幾廿年黎都係咁講架喎！)

11月27日(星期六)，是日約了婆婆、大姨細姨，仲有三姨一家去吃buffet。今次選了一間價錢中等，仲有幻彩fing香江睇的YMCA再臨閣。食物不算太高檔，又不算太美味，但勝在人不多，地點又方便，都食得好飽。食完仲可以去隔離Heritage 1881影下相添。

明日，海洋公園慶祝生日去！

迪士尼樂園

2010-11-27T23:10:00.001+08:00

2010年11月21日(星期日)，溍溍的第二次迪士尼之旅，對上一次係1歲生日，即係2008年了。今次除了都係同一架bb車去外，完全唔同哂喇！

前後兩年，大家可以自己比較喇！
今次天氣幾好，比起上次凍到呢，真係玩得舒服得多。

每逢聖誕，查實大致上都係果d野，連燈杆上的裝飾也差不多，大家估下左定右係今年同2008年的？

12點幾入場，先去了巴斯光年那裡取fast pass，點知撞到約都未必約到的Andy叔叔一家，然後玩過飛船，就要飛身去看獅子王慶典，這個是爸媽都未睇過的項目。場內容納很多人，30分鐘的表演很精彩。散場後就趕回玩巴斯光年，用fast pass很快就入到去玩，溍溍也取得L-2分數。然後又到趕去城堡前的薑餅人村莊逛逛，小休兼霸定位睇巡遊表演。

巡遊過後，再回到明日世界，今次到吃東西了。點了那個米奇魚柳包呢......影相幾好，吃就下次換個一款比較好。補充體力後正見到巴斯光年又出來開工影相，有人拉著爸爸出去排隊，邊排隊邊有縮沙，不過最後都好叻咁單獨同巴斯光年合照左幾張，然後仲同巴斯黎過goodbye kiss添。

影完相就去了小小世界玩，然後玩咖啡杯，今次第二次玩喇，08年那次都有玩呢！雖然仲有半個鐘，但還是趕去看最後一場的米奇音樂劇，點知入面已經有很多人排隊中了！入到去坐到山頂的第二行，好在位置中正，不過玩左大半日，有人係極嘈的環境下訓著左。

睇完已經6:45，農曆十六的月亮又大又圓的掛在天空。有人飲左枝奶後已經叫返屋企喇！唯有先去買點禮物，包括買給今天生日的姑姐、溍溍自己，還有買埋表弟果一份。回到美國小鎮大街，飄雪呀！晚上果然明顯好多，還差15分鐘就放煙花了，不過有人已經嚷著要走，於是影埋聖誕樹就回家在會所cafe晚飯去。下一次再去迪士尼溍溍已經無得免費入場喇，所以唔知係幾時再去喇！

即將三歲，大家又黎回顧下溍溍零歲、一歲、兩歲和就黎三歲o既樣，有咩轉變？

11月上中旬

2010-11-26T00:29:00.000+08:00

轉眼又到十一月底，仲有3日就到3歲了！係過去的十月下旬到十一月中旬，代言人因為忙到飛起(公司忙，係屋苑又要同管理公司開火)，同用左d時間黎趕起名古屋遊記，當然，梗唔使要等到姑姑梅咁講到要下次去到35歲先有野睇喇......

十一月初，收到學校的冬季校服，試穿之下......勁大件。左起冬季運動服、中間校褸，仲有右面的正常校服。

媽媽的同事捐贈左一條隧道給我玩，玩得愛不惜手，仲有Anna陪住玩添。

第二日繼續玩，呢次仲有埋Barney，不過講起friend底d，都係Anna，陪飲奶呢d大件事梗係有佢份喇！

因為天氣轉涼，爸媽將d去年冬季的衫拿出來試著，看看還著不著得落，點知有人連一d80碼的衫都仲著到，右邊的那件就係屬已絕版的hippo衫，仲黎返個固力果姿勢先！而左邊的係出世時，小樹熊姐姐和Kayi姐姐送的禮物，她們買的6-12個月碼的雞仔衫，點知有人臨近3歲先黎第一次著，係著得落，仲著到唔願除低。仲拎左新買的膠箱櫃的紙皮盒做「雞竇」來......

7號，是日媽媽返早，爸爸帶我到平台玩，有人拿了相機係度影影影，返到屋企仲熱辣辣都要繼續「做雞」。

玩又著，連訓覺熱到出哂汗都要著，如是者著了兩三日，有人仲要帶頂雞仔帽返學校比Miss Anita睇添！手上的bear bear熊，係姑姐送的，佢個名叫Alice。而家近身的好朋友，有Anna(長頸鹿)、Alice(熊仔)、Baby(正常bb公仔)、Barney(暑假時係商場嬴返黎的)、Buzz(新買的巴斯光年車公仔)，仲有個Annie.......有人幫婆婆起的英文名！

因為天氣轉熱，媽媽收起了雞仔衫。本來三歲有考慮過要唔要轉奶粉，但諗住都係食多一轉先，於是再訂了和光堂大仔一轉。今次Reon是8罐送4盒旅行裝。奶粉就用黎飲，但個盒都可以用黎玩，真係唔使點買玩具。

14號，又是媽媽返早的星期日，今朝爸爸帶溍溍去荔枝角公園玩，仲第一次自己坐無兜的韆鞦，仲要fing到好高添！今日仲有帶埋個波去踢，仲有人乘機踢入花圃，專登走入去執波。去荔枝角公園途中，是日好日見到好多人結婚，於是有人問爸爸：「爸爸，我3歲要結婚未呀？」

功課方面，今期有「風的形成」，學校d書無講，唯有上網搵到放學ICU有片睇教何謂風的形成啦！跟住又有人扮剪手指腳界，咁當然係「扮」啦，呢D操重野都係爸爸做喇！

某日，表弟浩浩過黎玩，有人請纓餵表弟食野，點知餵到入口就縮手，係單係縮手，匙更就留左係表弟個口度.......

19號，學校的11月份生日會，為黎緊的生日週揭開序幕，同日仲有故事大姨黎學校出席「故事爸媽」環節。

某夜，有人睇VCD 睇到訓著左......點知轉頭抬入房訓時，一醒就話要「玩」，卒之又一個鐘後先訓覺。表弟隔了幾日又來玩，不過係因為唔舒服又睇左佢屋企果便的醫生都唔多好，轉來睇我睇開果個，大家睇下表弟幾漲卜卜....哈......

10月下旬

2010-11-15T00:48:00.000+08:00

這個十月下旬的生活報告，竟和十月上旬的相差前後一個月，事關代言人忙碌，有空的話又全放到東京遊記和名古屋遊記之上，慶幸兩個遊記都已經完成了！

十月上旬身體不好，忙了近一星期，假期了，去公園吸些新鮮空氣吧！今次去了荃灣公園，不過初癒之時，還是沒大心情，只第一次玩了沒有兜兜的鞦韆，玩完鬆頭鬆頸，應該很好玩吧！

然後要做功課喇，今期主題「家庭」，功課冊上要貼上家庭照，於是出動相機自拍，有人還充做攝影師，右邊那張咁輕挑V哂手的，梗無email比老師喇，當然選一張正經點的。偶然，找來3月在上野買的朱古力(未過期啦梗係)，有人吃得不亦樂乎呢！

閒時，婆婆和細姨來到，會找我幫忙打蛋煎比我食；畫完畫又會霸下地頭黎貼堂(喂，阻住部高清盒接收喎！)；亦偶爾會跟爸爸玩得很開心(無曳無比人鬧的時候)；但好多時好眼訓都仲排住玩(喂，你睇你對眼都矇哂，仲坐到咁市井做咩？訓喇！)

10月23日，去了Gabby的新居參觀，相信呢兩個已經係幼稚園學生的小朋友，都唔會記得去年在名古屋相處了一星期的旅程吧！

第二天，媽媽放假，先去剛重開的會所cafe午飯，然後去了樂富行UNY，再然後去了佐敦永安大減價排大隊。買得一袋二袋，然後去坐小巴回家，有個不等嚷著要回屋企樓下的大家樂吃飯的人，在荔橋下橋位時聽到後面的叔叔叫「泓景有落呀唔該！」，然後有人跟著說「大家樂呀唔該！」

25日，爸爸收工後趕去Toyrus和石板街買星期五的萬聖節舞會道具，格了一輪價，小朋友的東西真的特別搶爸媽的錢，好在之前行街已知道有人會呢樣唔鍾意果樣唔鍾意，爸爸最終只花了70蚊買了一張斗篷和南瓜袋(未計之後買左百幾數朱古力放入去)。點知返到屋企試穿時有人嬲爆爆，好在玩玩下都笑容滿面，因為配合換季，爸爸去了H&M都買左幾百蚊衫褲，仲諗住可以襯埋去斗篷的，件件都試過，不過做哂3歲碼你都件件鬆身咁多架？

29日，舞會日，好可惜天氣冷，落街時穿上背心攪到笑到爆牙件衫睇唔到。回家後，朱古力派得七七八八，有人話最貴果幾粒hippo朱古力，佢親手比左老師喎！

婆婆&姐姐，查實我大個仔架喇，我曉自己食雞翼，我識手持雙筆寫字，我又可以自己夾麵食，仲可以搶著入廚房擔埋櫈仔去開奶飲(連面褲都未著果隻)，我仲識自己著衫穿褲，唔使太過幫我手架喇！自理能力係可以比依賴能力壓倒的，請放心我能自己做好多事架喇！

"2009名古屋之旅"遊記完成！

2010-11-13T23:20:00.000+08:00

去年今日，正身處名古屋，是溍溍的第一次外遊。事隔一年，遊記總算趕在一週年時完成，歡迎大家觀看：http://nagoya2009.blogspot.com/

由於歷經一年，遊記風格都有點不統一，不過在相片上，盡量以最多的相片(超過200張)，希望能留住兩歲前那一刻的一次旅程。

35個月

2010-11-02T18:44:00.000+08:00

又到達一d用倒數黎計算的月份了，還有一個月就是36個月，即係3歲喇！

高度已經超越90cm，但相對好多同學仔都仲係細粒，說話能力自從返學兩個多月後已經倍升，放學回家後除了還是偏愛英文老師多一點外，對於普通話老師，亦表示已經明白對方講的是甚麼(初上學時你有你講，佢有佢自己望住你果隻)。呢期流行口頭禪係「唔緊要啦！」，問佢想做咩o既時候，回覆總是「玩啦！」，早上起身果一刻或者吹埋臨訓果一枝奶(仲未戒)o既時候，近日總是「我好肚餓呀！」

除了上一期提及勁煲學校那一套phonics 「Letterland」外，最愛畫畫畫、寫寫寫，ABCDEFG.....仲有係屋企防衛能力最低o既時候，係呢度果度咁畫，細個時已經攻陷左幾塊牆身，最近仲有水筆攻陷左價錢幾百蚊的Thomas水筆海報(此水不同彼水，這是用清水的筆啊！)，在海報上做其神探伽里略......

此外，除了文字上的侵略外，仲有圖形方面。呢一方面，又幾ok喎，但通常畫了三個人，中間果個一定係媽媽，仲係最大舊果個，靠邊坐的才是爸爸......另外，唔知邊個教佢的，佢自己將英文的大小階或數字隨意寫係畫冊上，然後配對連線，咁又寫得一餐，對於增加多d爸媽的私人時間(起碼幾分鐘到十零分鐘)，咁又何樂而不為呢！:p

2010東京之旅遊記完成

2010-10-18T00:41:00.004+08:00

經過7月個，3月份的東京之旅遊記在集中火力下完成，連結在右邊的欄可以找到。而現正集中火力處理就黎一週年的200年名古屋遊記！

為左慶祝第一個遊記完成(雖然爬左頭)，就由溍溍跳返part Dippy Duck比大家睇(都係出自Letterland的)

10月上旬

2010-10-16T22:26:00.009+08:00

真係有咩都要留返拜山先講，10月份第一篇blog，重九先黎得閒寫。回顧10月上旬，special event有兩個，十一國慶假期去了科學館，10月9日去了學校的open day。

10.1科學館，因為是日爸媽都放假，自然醒後無所事事，食完午飯都未諗到去邊玩，於是選了坐12號巴士出尖沙咀，途中碰到久違的草頭哥哥，大家都大個仔哂！差不多3點幾先到達科學館，本打算玩到兩個鐘都偷笑，點知一玩玩到七點幾。第一次入科學館，都幾多野玩，不過內裡的電腦設備夠期入科學歷史館，真係超慢又超低解像。晚飯後大約八點半，爸爸想去看國慶煙花(都係諗住去到邊位望下現場，方便睇一陣即閃)，點知有人話要返屋企。回家沖涼時，有人話：「媽媽，下次唔好去咁夜街喇，我無訓晏覺，好眼訓呀！」

10.9學校open day，今日邀請了婆婆、大姨和細姨一起去玩玩，參觀下我的學校生活。星期六返學校，都係第一次呢，不過爸爸返工無得去睇。那裡有一個很大的happy birthday，每一層都是由廁紙筒砌成的，塗裝便是早前上課的活動來，積少成多都幾壯觀呢！其中有一些蛋糕的勞作，很華麗，不過怎看也不會是幼稚園生的手筆吧！而我那個融會了自小而學來的手工技術而製成的生日咭蛋榚，給留在包裝袋內釘在高高的板上，連那最精緻的可隨意插的蠟燭也看不到，原來連幼稚園也要華而不實的，實而不華的只好......

除了special之外，ordinary呢，有時做下小手工啦！某人用廁紙筒和顏色紙做了一個東西，有人說這是"船"呢！仲有呢，咪就係唱Letterland囉，唱到呢..... 又或者有時玩下iphone，呢期玩talking tom；又有時呢，爬高爬低搵野食囉！不過唔知點解，小朋友總愛爬高的，3x年前果個都係......

某天，因為平日常穿的crocs不合腳，於是出街去shopping，那天晚上還下雨呢！最後，戰利品豈只一對新crocos，仲附帶每個承惠$35的thomas閃燈pin共2個，還有一對moonstar新波鞋和車王手錶添！某日度高，身高90cm，快3歲的話就比中位線低了一點囉！

閒時也有落平台玩玩，或者係屋企打乒乓波，某夜爸爸在city super買了個吉百利的熱布甸，原來好似個蛋榚仔咁放入微波爐內叮一叮，然後倒出來就變成蓋滿朱古力漿又熱騰騰的好味東西來，吃得thumb up不斷！

每星期亦有返畫班，最近發現一張畫給貼堂，還要是向著最多人出入的吉豬島10蚊店，街坊的話，行過不妨參觀下。

10月13日，oh no.... 星期一大姨嘔嘔，已經即睇醫生好返，星期二晚到星期三凌晨輪到我嘔電嘔到天光，是日爸媽請假陪睇醫生和照顧，醫生說是腸胃炎，食完野都好易嘔。但病中有人竟然要畫畫，還要大筆幾揮畫了提子出來，也很像樣。而這幾天更加開竅不斷要人同佢玩大富翁，家中的新世代電子版和日文版都玩，但還是玩銀紙的比較吸引。某次，爸爸還只險勝30萬yen。

以上，就係10月上旬的生活了！

光與影

2010-10-02T10:44:00.007+08:00

繼早前爸爸突然心血潮跟溍溍玩過light painting後，九月末的兩個晚上，因為媽媽返夜班，又有人未訓覺，於是爸爸再拿出相機來玩玩，可能玩第二次，開始接受指揮，影出來也有紋路多了！不過下邊張相的ABCDEF都係爸爸一手拿相機一手拿電筒做出來的，中間那些才是溍溍做的(無郁身郁勢已好叻了)。

第二晚再玩，有人竟然教多兩下，識得反方向寫字，做出了類似"2"字的效果來呢！

34個月

2010-10-02T10:44:00.006+08:00

34個月，返學放學，偶爾有工作紙要做，逢星期五有故事書兩本(一本指定一本自選)，再加埋本身睇開果d，閒閒地一晚講十本都唔比人停...... 作息時間已完全改變，早上要自然醒的話，大概要十點後，中午校車返學，放學後午睡，然後6、7點起來晚飯，然後沖涼玩玩，訓得覺都差不多11點幾，有時精神起上來，12點都未肯訓。返學的日子，一天就是如是過，大人更周不時收工返黎食完飯，又陪訓一覺到天明......

閒時愛唱如超級無敵估歌仔聲調的Letterland，這是學校教授的那一套phonics，現在唱到Firefighter F，得閒唱、訓覺前唱、仲要對住個iphone錄住音黎唱...... 仲有拎起學校本書扮老師，「各位小朋友請坐低......」然後無論公仔又或在家的大人都要跟著被指揮......

南丫島及剪髮

2010-10-02T10:42:00.008+08:00

2010年9月26日(星期日)，最頭痛的就係星期日剛好爸媽放假的日子，因為訓到自然醒，落去商場食完飯，究竟去邊玩好呢？今日自然醒得早，食埋午飯都係十二點幾，於是爸爸提議去南丫島(靈感來自早一日去過的travelpooh哥哥)，於是先MTR，後坐船入南丫島。大人承惠每位$20船錢，我未夠三歲依然免費。(碼頭d玻璃反光貼，影靈異相都幾勁架喎！)

食住之前姑姐送的Pucca朱古力魚仔，大約25分鐘就到南丫島，烈日當空，帶返頂新買的帽帽，開頭一段都係食野的店舖多，買了雞蛋仔和燒賣都係買了一點沒大興趣，再行多陣，有玩具喇，仲幫襯左d婆婆買了隻珠仔穿成的金魚，仲即時成為新寵兒掛在身上(而家掛左係書包)。

就係憑魚魚的力量，加上爸爸話前面有沙灘，為了帶魚魚去睇水水，行喇~~ 連行到去阿婆豆腐花時，對豆腐花又無興趣、對魚蛋和香腸都無興趣，要走呀！要走呀！爸媽唯有飛快清左d豆腐花和魚蛋再起行。

到喇、到喇！魚魚我地黎到喇！水呀、沙灘呀！有人去到洪聖爺灣一見到沙灘和水已經興奮不已，嚷著要下水去，不過今日無準備任何下水用品，好在還常有一套後備衫褲在爸爸的背囊裡。由媽媽帶著行到水邊，即時撻著玩得好不興奮，差d想成個坐落水去！玩了幾分鐘，夠皮喇，褲都濕哂喇！係時候要約束一下強制收檔喇！沖水過後換上後備衫褲，再搵個位置扣上魚魚在衫上(之前未濕果條褲有扣很方便)，有人繼續情緒高漲，可惜時候不早，去隔離香草園打個轉後，係時間回程了！

曾經打算到風力發電場，不過問了路口的攤檔位阿姐，佢話要十五分鐘路程，於是都係回碼頭先算喇！沿途邊行邊飲朱古力奶叉電，行到近碼頭已經有人要抱，去到碼頭時太陽伯伯都想收工喇！

上船一刻，有人仍應精力充沛，不過拎個頭一下o既時間有人已經訓著左，暈都無咁快。落船一刻已經好似咕哩搬貨咁落船，抬住咁大包貨，於是轉去天星碼頭轉船過尖沙咀再坐6號巴士回荔枝角，有人真係訓到返荔枝角差不多落車先醒。

例牌Pizza Hut晚飯，見有人頭髮長長，夾個髮夾已經能夠變身Jinko，於是半拉半推去了Salon剪頭髮，繼續找Anson哥哥操剪，之但係有人喊到飛起，不過剪剪下又平靜下來，比完錢出黎仲識笑添！嘿~

九月份總結

2010-10-02T10:40:00.003+08:00

破紀錄喇！九月的第二篇blog，仲要十月先有得睇，理由都係一樣喇，返工的有返工忙，返學的有返學忙囉！

九月下旬，返學的習慣run到順哂，Letterland唱個不停(學校的phonics教材，除了主題曲Letterland外，26個字母向有一首，一星期教一首)，最抵死係仲有埋動作配合添！期間有中秋節假期，中秋當日返學就有中國服和提燈活動，中國服look在上一篇已經現左身喇(最後果張相右下角)，花燈呢，出世後爸爸買了個小楊桃，不過發哂霉，所以今年爸爸買了個吹氣蜜蜂仔(還有個同款不同色的給了表弟)，可惜當日好多東西要拿回學校，於是細姨送了個比較小型的爆丸車仔燈籠(其實爸爸和我都唔知爆丸係咩卡通)。不過由於爸媽返工，去到農曆八月十六才有時間帶我去玩。由於太女麻今年身體唔好，沒有去大坑看舞火龍，加上八月十五媽媽返通宵，八月十六早上只得爸爸帶我去玩。去麥當當早餐啦，去平台玩啦！一個晏覺醒來，跟住有人話我要去星河明居，於是去了婆婆那裡吃晚飯。

餘下的九月生活鎖碎事，不外乎星期六返下畫班，不過今次除了畫畫，老師仲教左了隻雞脾出來。然後又某一日，有人突然覺得雞翼好好味，自己吔雞翼是也。

又有一日，有人玩Thomas火車，玩玩下都唔係玩下o既，係度snap shot影埋d咁o既相出黎..... 九月仲有d活動o既，另篇再寫。

開學後的日子

2010-09-20T02:35:00.006+08:00

不計每月28日的成長報告，這一篇和上一篇日常生活紀實已經相距超過一個月了。在這個開學後的一個月裡，大致上都是返學和放點病假的日子。不巧地，代言人又剛遇上了超忙碌的工作日子，攪到有觀眾來催促、又或是有人以為代言人隱居了，以下落黎，簡單匯報一下這一個月來發生的事：

自從八月中開學後，上了一星期學就病了一星期。從好處看，早病早著，多點抗體，好過萬一遇上流行疫病的日子，清純的身體可能更容易給感染。第三星期一返學，只消一天時間已經能回復正常軌道了。曾經在家中翻看幼兒園的相片，連司徙老師和吳老師已都忘記得一乾二淨，現在口中只會掛著Miss Anita、穆老師、麥老師，還有興趣班的Miss Grace和許老師(呢個排名應該有分左先後的)。唯一還牽掛著幼兒園的東西，就是那本歌集，每當有人扮老師彈琴的時候，要不是幼稚園那一本，就是幼兒園那一本......嘉心幼兒園那一邊的悅讀會已經上完了，由於時間不合，新一期的暫不會再參加了。特別是每當返回嘉心幼兒園時，有人發現不能從正門的玻璃門進入，就會"喊走"，雖然氹下氹下都入到去，但對於星期六還老老土土地要返工的爸爸來說，收得工黎再趕過去，氹完又過了半場，完了又要趕回家叉電然後到音樂班，還是有緣再見吧！

由於現在是下午班，生活節奏全改變了！早上會睡得晏一點(相比起返幼兒園要七點起身)，不過以近日計還是八九點就醒來，然後是早餐和辦下"大事"，跟著又到食午飯和上校車去。下午回來再小睡，接著又到晚飯時候。跟著到爸爸放工回來，可能已經沖埋涼做下小小家課，story time後，訓覺時已經可能差不多晚上十一點了。

玩樂的時間，可想而知不剩太多，但總會有玩玩的時候，例如和爸爸玩light painting(最失敗的model喇，叫極唔會郁身但總會郁左)、lur住玩爸爸部電腦開word打ABC啦，還有抽空去培培幼稚園玩玩.......

這個月來，特別event也有，例如11號去了業哥哥美寶姐姐屋企玩一人一餸歡送大食會，當晚有爸爸從九龍城街市買回來的炸魚蛋($76蚊有224粒)，並由工人姐姐代為煮成馬來風味咖哩魚蛋(可是姐姐是印尼人喎！)，配以爸爸從九龍城買來的聞名蝴蝶酥和牛油杏仁餅助興。業哥哥那邊還有炸釀豆卜、炸燒賣和各式飲品，此外還有各家鄰居帶來的如馳名蘿蔔牛腩、雞翼、豬扒、沙律、白切雞、燒肉、西蘭花，還有啫厘糖，好豐富呢！飯後，還有大人們的某"波特"的搬竇前展銷會和小朋友們的放紙飛機時間，同Amanda姐姐和Catherine姐姐玩得很開心添！另外仲有蕎蕎、小柔和bottle仔，不過他們太小未有玩埋一堆。

第二天12號，約了契媽一家一起去將軍澳探洗姨姨，因為初生的妹妹終於出院回家了！可惜，不知是巧合還是整定，每次約親都遇上落雨的日子，當日還遇上特長持續的風雨，在將軍澳區下午起到晚上都落過不停，於是只好去了鄰近港鐵的某屋苑會所跟嘉駿哥哥、希希哥哥玩了一個下午(契妹和bb妹妹仲未識玩呢！)，然後待到黃昏去附近餐廳晚飯算了！那天還巧遇上又是約親都時間不合(有一次應是準備出發到名古屋旅行前一天，有一次應是有人病了)，足足相隔了11個月才初次見面的Yi Ching，他跟爸爸波叔叔被大雨困在港鐵站，有家歸不得啊！不知從名古屋買回來的口水堅手信，不知他還帶得上嗎？
最後，是報告一下有史以來最大製作(第一份)的親子功課，就是幼稚園的十週年開放日的手工勞作功課，當中包括構思、草圖、買材料、催促、落手製作的一家三口，大約用了一星期時間(都係有限的空閒時間)完成。作品的製作包含了水彩、蠟筆、剪紙、海綿印技法，還有黏貼和撟扎等技巧，特別是所有製法和技巧全部降級至幼稚園程度，可想而知難度有多高，當中還加入了環保概念，全程只花了一張大白畫紙和小量縐紙而已。完成後的感動情度簡直達到聞者傷心、聽者流淚的境界......

33個月、第400篇及第14代banner登場

2010-08-28T21:39:00.007+08:00

2010年8月28日，33個月或2歲9個月了！呢一刻，已經係一個幼稚園學生，可惜這個8月過得麻麻，病了兩次，其中一次還重返了B935星球，希望這個"病人童話故事"不用再加註。

上學由從前的爸媽帶著到現在在樓下上學車，放學又是校車很快便適應了。學校的茶點，餅好吃還是蛋榚好吃已能娓娓道來，上課前的體操歌也懂了一點點，起碼唱不出也能做出動作來。由第一天說怕怕普通話老師到現在在家中要人跟他說普通話，對爸媽而言，攪掂喇！不過，下一步要看學校如雪花般飄來的家校通告和活動，他們何時能適應。

今天，我還第一次擁有屬於我的children pillow (a牌的，是爸爸在永安公司買的)。之前，我還是訓bb枕頭，不過最近我都是霸了爸媽的枕頭來訓，哈~

今篇blog是48cm開blog以來的第400篇，特此呈上都積左好多個月的2010年3月東京遊記首三天的初步完成版。文字內容是最近完成的，而相片是當日在東京時某天執的。稍後或者再增加多些相片給大家看。「2010東京之旅」的網址是： http://7dtokyo.blogspot.com/

進入幼稚園生活，特更換上一個第14代48cm banner，醒神吧！
(2010.08.28~2010.11.27 )

重臨嘉心幼兒園

2010-08-15T10:36:00.002+08:00

2010年8月14日，再次重臨嘉心幼兒園，不過唔係返學，而係悅讀會的活動。闊別大半月，已經有點陌生感覺，一入課室......嘩~~~又喊喊！攪到熱身活動都沒有參加，到故事時間才冷靜下來，爸爸還被邀扮故事中的大象。手工時間是玩泥膠做pizza，然後是交換不同顏色的pizza，令自己的pizza變成彩色的。

由於不願訓晏覺，到4點幾才小睡片刻，5點幾又到音樂班時間囉！

開學喇！我是幼稚園生！

2010-08-14T00:14:00.007+08:00

2010年8月13日，開學喇！今天從幼兒園生升級到幼稚園生，學校轉了，連上學時間亦轉了，從上午班換成下午班，還要坐校車的。生息生活將從此大轉變，午飯過後換上校服，媽媽送上利是一封，還語重深長說教一番，我只知道要說「知道」，否則媽媽手上的利是可能會握很耐才會送到我手上......
上校車的地點很便利，就在家下面的商場迴旋處，很安全，亦不用日晒雨淋。到達時已有幾個同站上車的街坊同學仔在等候，大家被爸媽或親戚圍著在拍照。

上校車喇！今天第一天上學去，可批准一位家長同行跟車來回，專程放假來拍照的爸爸，還有專程來看我上學的婆婆和大姨只好跟我隔著車窗揮手"暫別"。而今天開學日可最多兩位家長陪同，於是沒有校巴坐的爸爸，只會走去乘的士。

進入學校，探熱和消毒劑擦手手就進入班房，因開學日只有一小時，時間匆匆。先由老師帶領出班房然後幾班一起做運動熱身，然後我那班先被安排去洗手間，去完出來，"嘩~~~"，當眾領喊，成為第一個喊，連扮玩火車回班房也沒有搭在前面同學的膊頭上，全程只拖著媽媽的手。回到班房，由普通話老師點名和介紹書包物品等，被安排坐在中間位置的地上，久不久就"嘩~~"喊起來，好在後來另有兩個同學也喊，免得成為獨家專利。

普通話老師介紹後到英文老師，最後衝次是茶點時間，蛋糕很美味，要不是第一件丟了落地，前後可吃了三件。

由於學校有指引，校內相片勿上互聯網，故這張喊相只好作出一點特效遷就。

放學了！媽媽陪著坐校車回家，爸爸就自己走。

爸爸影這張車窗照，終於領會到影囚車是很難影的，還要是烈日當天勁反光之時。

回家後，媽媽問溍溍，點解喊呀？他說是「秘密！」

晚上，爸爸趁替他沖源時再問溍溍點解喊呀？

謎底終於解開了！

他說：「因為去洗手間覺得污糟，所以喊囉！」

(媽媽陪去的，應該唔係囉！)；

然後是「因為要坐地下，所以喊囉！」；

再然後是「因為驚普通話老師，所以喊囉！」

大姨，要特訓喇唔該！

康復中

2010-08-14T00:09:00.003+08:00

2010年8月10日出院了，根據醫生指示，要繼續服用抗生素(完成療程嘛！)，還有定時聞氣管舒張劑。

11日，唔係怕比人見到，只係玩到無野好玩，神秘人聞藥中...... :p

12日，早上回B935行星給主診楊醫生檢查，一齊良好，回家玩玩去！

係度再一次多謝各位的關心，特別是媽媽公司的同事體諒！多謝哂咁多位姨姨！

再見喇！B935~

2010-08-11T08:50:00.007+08:00

入院第三天，昨夜很熱鬧，隔離床入了個呼吸困難的BB，情況很嚴重，最終還是轉了去ICU。而媽媽亦因為這些熱鬧，眼綑得很嚴重。早上已不用再聞藥和牽著那個Pulse Oximeter了，活動自如，還和隔離BB的爺爺傾計，仲問左佢地住邊，應該是婆婆附近的宏景花園。中午婆婆來接替，再次剩下4張床的病房變得較寧靜，跟著便睡了！

午睡過後，醒來已由爸爸接替，由於早上醫生巡房時說過如沒事便可出院，於是等呀等，玩iphone，玩爸爸換來的三眼仔筆筆同寫字，等到5:30連餐都派了，醫生終於來了！楊醫生檢查後說用聽筒還有少少喘，於是選擇來了！一是出院再來覆診，期間繼續食藥，一是留院.....係呢個時候，係度poopoo都痾唔出(環境未能配合嘛！)，梗係出院喇！

執拾過後，婆婆和細姨都來了，出院喇！再見喇，曾經兩次生活於這個B935小星球，唔好再見喇！拜拜~~

下午活躍得玩倒立也可！

為答謝咁各位連日的掛心，現特送上早上由溍溍畫的圖畫給大家欣賞：

第一幅：標題叫「POPO」，左邊的"入"字查實係把遮，
而本來署名想寫婆婆英文名，點知媽媽回說，婆婆沒有英文名喎！第二幅：標題「媽媽」特別是大眼睛，
不知天不天真，但畫得很傻，哈哈~~

第三幅：「三姨與三姨丈」，真的很難想像，

如果三姨和三姨丈真的是這個模樣的話，表弟應該會是怎麼樣子的？

第四幅：「Barney」

第五幅：「爸爸」，沒帶眼鏡會變這個樣嗎？

但爸爸覺得這似鋼鍊的人造人庫拉多尼喎！

留院第二天

2010-08-10T00:48:00.002+08:00

留院的第二天，早上醫生巡房後，由吸藥轉為聞藥和食抗生素。昨夜抽血和抽鼻液，因為媽媽不能陪，事後問溍溍，喊住咁回應：

媽：「姐姐剛才幫你捉左幾多條鼻涕虫呀？」

溍：「嗚...兩條呀~~嗚....」

媽：「咁你驚唔驚呀？」

溍：「嗚...驚架！~~嗚....」

媽：「咁你有無唔該姐姐呀？」

溍：「嗚...嗚....唔該姐姐....嗚....」

但經過一晚之後，精神已不錯，只是還有氣喘。午飯後，爸媽換更，陪了一夜的媽媽回家休息，爸爸還有婆婆留在醫院。爸爸接手兩個鐘，溍溍還在跳跳跳，最後到5點鐘給爸爸拍了15分鐘才睡著，一訓就兩個鐘。起來吃晚餐和聞藥，8點幾又到媽媽接更了！

舊地重遊

2010-08-09T01:43:00.003+08:00

2010年8月8日星期日，媽媽放假日，本打算沙灘去。不過早上起身流鼻鼻同有d咳，但仍很活躍，於是中午先決定去個午飯才再作打算。去了美孚午飯，期間開始有d氣喘，食完飯唯有打道回府休息休息。

午睡過後吸了藥還是有喘，但情況不算太差，可惜晚飯後變成很喘，人謝了竟然去醫院這句也出自溍溍的咀巴(雖然中間亦曾說要去看久保醫生，但他在東京池袋，很遠啊！*)最後，大約9點決定去QE看A&E，好在人不多，很快便可以到分流站檢查，但因為氣很喘，初步檢查後即被安排坐在氣椅(有氧氣樽的輪椅)上推進急救室去。由於很合作又沒有喊，媽媽先陪進去檢查和吸了藥，然後由爸爸陪著照X-ray，跟著便被安排入院了！

在A&E待了一會，一位哥哥便推溍溍上病房去，沿途印象深刻，660天前才離開的地方，巧合地，還被安排同一張病床，久違了的35號床，同一個位置，同一個景觀(晚上看到朗豪坊的燈光)，只玻璃窗上多了麥覺響噹噹的貼紙而已。

今天晚上房內6張床暫只有3張有病人和陪伴的媽媽們，希望氣不再喘，度過一個寧靜的夜晚吧！哎呀，不過成點鐘還要安排抽血和抽鼻液化驗啊~~可幸今次不用打豆豆輸鹽水，只需夾著手指check血氧和帶貓鬚而已。

*3月東京之旅的第五天，因為持續氣喘，從北池袋找到去南池袋看醫生，吸了藥後精神很多，還待在診所差不多一個鐘，所以溍溍很記得那個久保醫生。

開課前學校探訪活動

2010-08-05T09:01:00.004+08:00

穿了半年多白鞋，終於到人生中的第一雙黑鞋出場了！

2010年8月4日，K1開課前的學校探訪活動第一天(在開學前共有6次，每次45分鐘)，好讓新生先熟習環境，因除開學禮可以爸媽陪著外，正式上課開始就不能陪了！

由於學校有指引勿將在學校拍的相片隨意上網，所以呢，神秘d...低調d... XD

八月一日

2010-08-05T09:00:00.010+08:00

八月的第一天，正好是星期天，天氣炎熱，媽媽返工。和爸爸起身後，吃了些餅乾，落平台玩滑梯，可惜又晒又發現有蚊滋，於是改去街街。有人說，想要坐船和搭巴士，於是先坐港鐵去中環。途中有人又說，想吃腸腸，有包包包住果d(即係熱狗，之前有人係大家樂食過一次)，於是在中環先繞了去昭隆街，可惜永樂園沒有開。然後經天橋去中環碼頭，途中閃了入郵政總局過冷河，然後又到ifc mall借廁所。坐船過海不消幾分鐘，五枝旗桿也不及陳慧琳廣告明顯......

烈日正當空，時間又不早，但有人仍說要影相，然後拿起相機追著白鴒來影。身水身汗下，最終去了崇光吃紀文的關東煮烏冬。充電過後，去彌敦道坐1號巴士去竹園，打算等媽媽收工。在車上有人不肯睡個覺...... 去到竹園，時間剛剛好，媽媽收工來到巴士總站，然後往黃大仙港鐵站去。找到有熱狗吃的大家樂，可惜排到收銀處時發現已停售，有人堅持吃熱狗，唯有改去德福看看，順便看恐龍。

在德福的大家樂終於找到熱狗吃，但此時有人反而要吃西多士，還有很想很想玩門外那架要六蚊雞的跑車......再看了一會恐龍後，回家去了！

查實，有人上巴士不願訓，在彌敦道上還和爸爸嘈交唔肯訓，位置在柏麗大道上，不過去到油麻地郵政局，已經有人......哈哈哈~~~~ 硬頸得過周公急call咩！

7月末

2010-08-05T09:00:00.006+08:00

短暫的暑假中，久不久畫下畫，不過最開心的過程，應該係最後清理工具將紅橙黃綠青藍紫色撈埋一隻烏黑色o既時候......
7月末某日，因事晚上和爸爸去三姨家取東西，在雨中的的士上雖然收到媽媽的召回令，不過由於沿途沒有轉折路，於是照原定計劃到三姨家。不過有人去到又拉表弟張high chair又大聲叫，嚇得表弟大喊，不過好在有三姨呵返......

屋企樓下商場的周末暑期活動，是Barney promotion，經過兩星期投資下，終於在對小朋友無咩愛心的哥哥手上，得來最安慰獎的folder、中等獎VCD，還有大獎Barney毛公仔。但不知何解，Barney手上的紙牌是Baby Bop，唔通係老翻？

32個月

2010-07-31T19:55:00.003+08:00

2010年7月28日，32個月，係呢個月話咁快就完成左嘉心幼稚園的畢業典禮表演和在頒獎典禮上獲取在學的第一張證書《成績優異獎》。而7月23日，我的幼兒園生活亦結束了，開始短暫的暑假，8月13日就成為幼稚園學生了！而第一次進入電影院亦在這個七月天嘗試過了！

在各方面的進展中，說話清晰，有d時候係小咀巴彈出來的說話真係聽到爸媽哭笑不得，同質疑究竟係咪兩歲八個月架？身高近幾月進展較明顯，去到89cm，體重當然都一樣增加左，要抱時抱得手仔軟(梗係爸媽果兩雙喇！) 現在已不驚洗頭，不過會洗前重申"唔好淋到我眼睛呀！" 訓覺就越來越夜，9點幾10點入房講故事，講完一本又要講多本，仲要講到大人訓著都未訓。

近日都幾叻講數，唔准佢做某d野或者要佢停止做某d野o既時候，佢會"玩多一次"，"最後一次啦！"，仲有成日認做大人，但到無著數又會認返做小朋友。

暑期活動第一件：沙灘去

2010-07-25T23:35:00.005+08:00

2010年7月25日(星期日)，暑假開始的第二天，第一件暑期活動即將進行。不過中午先到沙田女麻女麻家一趟。今次好像是第一次坐上沒冷氣的72號巴士，其實沒冷氣的車走這類路線，車窗迎進的涼風，比冷氣還舒服。

探完女麻女麻後，先回家小睡。不過在回程的86號巴士上已睡著，反而回家後沒有睡到，於是先到樓下商場下午茶，然後出發去黃金泳灘。在長沙灣廣場乘52X，大約40分鐘就到。由於是夏日，下午5時許的天空還是熱刺刺的，太陽伯伯還有個幾小時才夠鐘收工(是日天文台預測日落時間是19:07時)。

可惜的是，換好了泳裝，才發覺原來掛了紅旗，根據廣播是因為發現附近有油污所以要封閉。唯有找個位置玩沙喇！不過，仍有不少人在浮波以外玩水，玩沙當然要取水，我也去了3次玩水呢！太陽伯伯收工了，再乘52X回家，先在九巴總部樓上的餐廳晚飯，吃了差不多，人攰得訓在sofa上......(喂，有人訓係度係較正角度睇電視咋喎！)

幼兒園上學的最後一天(下)

2010-07-24T08:34:00.006+08:00

正午12時，放學喇！行出呢個門口，就結束左我o既幼兒園上學日子了！仲有其他媽媽帶了相機來想找老師一起影相留念，可惜司徙老師和吳老師要照顧全日班的同學午飯，未能合照。可幸還有親切的校長有求必應呢！有個媽媽還帶了些鉛筆來送給同學們呢！

當一眾同學們圍在前面哈哈笑的時候，有人扮cool獨留在後面，

有點像足球比賽踢罰球時的門將和人牆啊！

到一個人玩時，又可以活躍得興奮跳起！

跳起，落下，回到地上，要正式離開這裡了！

午睡後，去了上第一堂的美術班，這就是我的大作。
媽媽向爸爸說，老師說我很有天份呢！但爸爸心想，不讚你有天份，
那怎留著你下一堂再幫襯呢！"有天份"可值百幾蚊或百幾蚊的倍數架喎！

幼兒園上學的最後一天(上)

2010-07-23T09:42:00.006+08:00

2010年7月23日(星期五)，雷暴警告仍然生效的早上，慶幸沒下雨，相比昨天三號風球又黑色暴雨，真的天公造美的給我這個幼兒園上學日子的最後一天。

上學不是坐6C巴士就是美孚小巴，今天最快來到的是小巴，同車還有住在宇晴的隔離組同學李卓浩和另一個應是K班的哥哥。

月初激嬲爸爸以來，被勅令要自己用雙腳走路上學已個幾星期，今日大優惠從美孚小巴下車起可以抱到上平台，之不過就換來被強吻的下場喇！(爸：邊個叫你要抱呀！)

然後再和媽媽合照，就步向學校去了！

門前留影後，就係最後一次以學生身份進入嘉心幼兒園了！
下一次再入來，係8月14日的悅讀會活動，那時我在幼稚園已開學，身份已不同了！

嘉心畢業禮+Toy Story 3

2010-07-18T20:10:00.009+08:00

2010年7月16日是嘉心幼稚園的畢業典禮，身為幼兒園一份子的我，畢業就無我份了，但表演就有一份兒。特別是3天前的家長日，爸媽領成績表時，獲司徙老師告知因評估成績全部獲A而獲成績優異獎，於是畢業禮當天多了一份參與。

首先，是K3班的哥哥姐姐行畢業禮，今年共有10人畢業。然後到頒發成績優異獎和進步獎給N班的同學們，我就從K班的趙老師手上獲取了證書和禮物一份。
然後到表演時間，包括有K班的哥哥姐姐表演，還有我們N班的《I am so happy》和《快樂笑笑》。

而我有份參與的是和其他8個同學一起的《快樂笑笑》，造型很sharp呢！爸爸自從給了服裝費以來，一直以為不是扮樹就是扮花，原來係咁colourful o既！由於校長事先張揚可以encore，所以總共跳了兩次。

最後是全體畢業生和表演的同學大合唱兩首歌，當然，呢d歌只有d哥哥姐姐識唱，我就陪坐喇！由於畢業禮在學校舉行，在親切的地方，大家的爸媽都很雀躍地舉機影相影片，按比例看，出面那些大明星也沒有那麼多鏡頭集中呢！

人山人海，我就坐在前排中間啊！前排左一的就是我的班主任司徙老師啊！(下面張相可放大啊！)

開心的時間過得特別快，在嘉心幼兒園的日期還只剩一星期。離開學校，也不願脫去表演服，沿途正值午飯時間，換來美孚與荔枝角一帶的大姐姐撞面就說"好cute呀！"(通常d大哥哥係唔會咁講o既！)然後回到屋企樓下商場，哦！今個暑假有Barney活動啊！

這就是我的第一張學校證書囉！

回家午睡過後，爸媽說不如去看戲！自出娘胎，我也未去過戲院呢，不過就入過挪亞方舟的兩個影院，還有歷史博物館和文化館的影院。懷著挑戰的心情，爸爸在網上先訂票，然後飛身到淘大的影藝戲院看2D粵語版的Toy Story 3，這亦是爸爸自我出世以來的第一次入戲院啊！電影6:00p.m.開映，坐在K行13號座位媽媽的大腿上，前面沒人頭隔擋，7:00 p.m.順利通過，7:05p.m.左右，終於有人叫"我要走呀！"，爸媽立即發動麵包和朱古力奶攻勢，大約7:20p.m. "我要走呀！"又出現了，這時媽媽叫拿來iphone，卒之一家三口八隻眼，有兩隻在這餘下的30分鐘是放在Angry Bird和LiveSketch等iphone game上面。安然步出戲院，問他好不好睇，有人說"好睇"。不過第二天再問，有人說"入面好黑，好驚呀！"......

浸會大學及Mega Box

2010-07-18T19:55:00.003+08:00

姑姐畢業了！恭喜哂！不過sorry喇，下面果滴眼淚同埋喊唔係因為姑姐畢業感動而來的......話說有人當日中午玩對講機比爸爸制止抱開，然後有人摑左爸爸幾把，仲搶眼鏡，然後仲咬爸爸右手指關節位同心口(之前幾日已經有人咬左右手中指關節位)，之後仲係態度囂張，簡直足可造就一宗虐殺親兒或激死老豆搵山拜事件。兩人對峙數小時後出發去浸大跟已身穿碩士袍的姑姐，還有三叔三嬸、孻叔仲有Icy姐姐等影相。初初去到面對超黑面爸爸有人唯有以淚擋格囉！
之後沒有跟姑姐一起吃飯，拜託了三叔車我們去Mega Box，那裡剛好有麥兜展覽，然後走走看看，六點吃了個午+晚飯再逛逛街才回家。

悅讀會第二次活動

2010-07-18T18:17:00.002+08:00

繼上次係屋企樓下會所攪的親子競技活動，第二次閱讀會的活動係返回嘉心幼兒園的活動。包括玩大風吹、講故事和做帽帽活動。不過有人活動期間喊左幾次，包括叫佢坐係度聽故事和去排洗果時。

之前爸媽未有機會參觀課室，原來我個書包位係係霏霏和芷喬中間架喎！

新校服

2010-07-11T00:51:00.003+08:00

還有兩星期，我在嘉心幼兒園的時代就完結，換上的，將會在一個月多一丁點的日子，穿上新的校服，做個幼稚園學生去了！左面是運動服，中間的是夏季校服，右面的是加了外套的夏季校服。由於是返下午班，將會是一個重大的轉變呢！
而快將離開的幼兒園，將會在16號有畢業禮，但其實是給K班的學兄學姐的，之不過溍溍將有份表演，先來個家下rehersal給大家看：

我的七一

2010-07-10T22:39:00.002+08:00

香港回歸祖國13年？香港特區政府成立13週年？政改方案通過後的七一遊行？對我黎講都唔知咩事黎？我只知今天是假期，外面藍天白雲但熱得要命，爸爸放假，但媽媽要返晏，於是吃了午飯後媽媽返工，我就和爸爸一起訓晏覺。

不過，今天我也算有節目的，就是黃昏時份帶我到會所參加街坊Amanda姐姐的生日會，本來只打算交禮物後坐一下就走去公園玩玩，不過去到有好多街坊，又有好多氣球玩，卒之吃了點東西才走。然後，還要在會所的遊戲室多玩半小時才回家，都超額喇！

6月中下旬補回

2010-07-10T20:02:00.006+08:00

呢期代言人又唔得閒，相差大半個月都只係update左31個月果一篇仔野，今次補回6月中下旬，即係端午節後的生活點滴。

端午節後生活如常返學放學，星期日落平台玩玩。不過有人成日唔願行要人抱，果種攤大雙手衝埋黎的動作，尤如biohazard入面d zombie咁，返學又要抱，出街又要抱，對腳都唔知生黎做咩？！
父親節當日，約了大姨的老師楊老師出來晚飯，同場仲有表弟。表弟越睇越似三姨呢！

再一個星期天，又係玩玩時間，拿了在東京Tokyu Hands買的吹氣地球出來，吹得爸爸氣都咳，原來係咁大個o既。另一件玩具係釣魚玩具，本來是從普通釣魚機和Toy Story的釣三眼仔機中選擇，不過有人點都要普通果款。然後是參加了某組織和幼兒園方面攪的一連串活動的第一次活動是親子競技活動，場地就在家住屋苑的會所超方便。是日被編入紅組，經幾回合比賽後嬴左第一名。同場仲有些認識的同學仔，同係士多啤梨組的霏霏和芷喬，另外仲有爸爸比我還熟的悠悠。

27號果日真係超忙，中午在會所2小時參加競技活動後，多陣又係會所3小時，因為今日係媽媽和大姨同一班她們暑期工認識的朋友一起慶祝相識x0年。所以呢，原是媽媽和大姨的同學的契媽，都一起來玩玩，希希哥哥和契妹希兒當然也有來喇！可能當日能出席都的都是男仔，契妹當天大受歡迎。而大姨和細姨一起主持的遊戲，四仔包括希希哥哥、柏謙哥哥、名晉弟弟和我都玩得很開心呢！

31個月

2010-06-29T21:19:00.004+08:00

兩歲零七個月了，看上去成熟了很多(因為張相影得黑d，仲成熟)，已經沒太多bb樣了！

距離幼兒園畢業只剩兩個多星期，個半月後就進入幼稚園階段了！而係畢業禮上將有份表演呢！

身高體重分別不大，但常不願行路，抱得爸媽手也軟。動作反應已快，不過最近多了很多"驚"的事情，洗頭"好驚"、挖鼻"好驚、挖耳"好驚"，連有時爬高都"好驚"，距離bb階段已越來越遠了！

認知說話方面，真係唔似一個只兩歲七個月的小朋友啦，溍溍你大個仔喇！

端午節

2010-06-18T03:58:00.006+08:00

2010年6月16日，端午節假期，剛好爸媽都放假。應該是幼兒園教過端午節是甚麼，溍溍一早嚷著要睇龍舟，由於時間關係和資訊不發達(都唔明點解咁傳統的節日，要搵幾點到幾點去邊度睇到龍舟都仲係好難o既)，10點多出發乘72號巴士到沙田，這應是第二次到沙田看龍舟，不過有人當時年紀少，唔記得啦！

巴士到沙田時，悶熱的天空又再洒下大雨來，於是在新城市廣場先下車去shopping，待雨停下才去看龍舟。先在Uniqlo買了衫給爸爸當作父親節禮物，shop完出來後已停雨了，便往沙燕橋進發。在橋面找了個位置看，人頭湧湧，看了兩場便撤退了，因為時候不早，午飯去是也。在意式餐廳吃了餐麻麻地的午餐，然後去了第三期繼續shopping。

有人行過某電訊店看到巨型的iphone廣告，突然停了下來，好想好想"禁"下佢呀......最後在另一面"禁"過一部平面電視扮成的iphone先肯"被帶著離開"...... 逛了一田、荷花和Toyrus，查實想買架士的車給溍溍，因為成日要人抱，真係幾攰的，不過價錢不便宜，三思中！最後去了麻布茶房打算吃點冷品，可惜位置悶熱，又停得久，軟雪榚上枱時都已經滴滴下融化中，black list啦！都係溍溍最醒，雪榚又係佢話要食，不過去到成4點都未訓晏覺，還是飲返枝奶訓覺去最爽，最後還是抱著訓直至返到荔枝角為止。

以下落黎係「溍溍Jelly教室」：

1. 首先要準備一碗熱水和一碗凍水，再加jelly粉一盒；

2. 將jelly粉放入熱水攪攪攪，再添埋凍水又再攪攪攪；

3. 跟住將jelly水倒入一d小杯中，放入雪櫃，雪凍食得！得o左！

再以下落黎係呢幾日的「溍語錄」：

1. 話說有人不好凍點，人家吃雪條他搶著吃但查實只是象徵式的用脷"lam一lam"。有一日，有人做了jelly來，已經雪凍食得。於是爸爸叫他試一口，跟住有人突然伏係梳化度話：「暈o左！」以逃避試食jelly的命運......

2. 又話說有人常要人抱唔願行：有一朝，爸爸帶他上學去，在平台上因雨天過後很易看到蝸牛，於是爸爸對他說，我地一路行睇下前面有無蝸牛呀？誰知這計仔只能行上半個平台，然後有人張開雙手對著爸爸說：「蝸牛訓哂覺喇，抱抱啦！」......

3. 又又話說媽媽跟婆婆談論某學校有小學生打架穿頭要入醫院事件，於是媽媽問溍溍：「如果你比人打，你會點呀？」溍：「叫救命囉！」......

元朗公園+樂富中心

2010-06-14T21:54:00.005+08:00

星期日難得爸媽都放假的日子，今天訓得晏晏之餘，起身要搵地方去玩下先係架！在屋企樓下100分食完飯，查實都仲未諗到去邊，於是去了三聯搵書擇地方，跟住都係諗唔掂。但外出的決定很強，於是行了去南昌站。在車站內仍在想去那裡後，最後上了西鐵，本想去美孚轉回荃灣線去樂富行新開的UNY，不過一個站，決定了~坐下來去元朗公園！

在朗屏站下了車，有人唔願行，於是抱著個唔願行的小朋友一身汗地行去元朗公園。去到一片草地，有人終於肯落地了！往百鳥園行，兩邊都是草地看似不錯的，但上到去，又蚊又毛毛蟲。進百鳥園看，還是香港公園較吸引。繞了一圈，最後還是跑到長椅在悶熱的天氣下吃點餅餅和朱古力奶，還有看著那對無聊的，星期日還一身校服扮model的姐姐，從百鳥園影影影，再影到出來四處都見她在擺著幼稚的pose.......休息了一會，和爸爸帶著幾個蚊痕離開，決定往樂富去。
乘巴士到黃大仙，先在龍翔中心借個廁所換過片片，再轉乘港鐵到樂富。人頭湧湧，因為UNY在此開店，位置原來不是之前的吉之島，而是原來的酒樓那邊共兩層。查實可看的不算多，做爸爸媽媽的，可在那裡的玩具部找到一些蒙特梳利的玩具；還有很多大富翁和SCRABBLE，Thomas等等。不過抱得很攰的爸媽在那一刻，查實最想買架士的車給我，因為很累很累，不過款式少得可憐.....再行埋食品那層，人很多，香港人吃的動力的確很強。時間亦差不多，於是在百瀧吃個早一點的晚餐。

回到荔枝角已是7點幾，見仲有時間，hair cut啦！在幫襯開的salon內，溍溍問剪髮的Anson哥哥：「你得唔得閒呀？」Anson哥哥回說：「得閒呀，你係咪剪頭髮呀？」溍答：「唔係！」話雖如此，但還是被帶到椅上，由媽媽抱著剪(因為有另一個小朋友在車車上剪緊)。溍溍今次好叻叻，雖則眼淚在心裡流，但為了吃到Anson哥哥給的糖糖，很努力地捱到最後，結果當然是happy ending，Anson哥哥還開了粒糖糖給溍溍吃，而爸爸只有去比錢的份兒。

6月12日

2010-06-13T02:14:00.003+08:00

表弟篇：
今天下午，三姨和三姨丈帶了表弟來探我，這可是表弟第一次來我家呢！2個多月大的表弟漲卜卜的，雖然我剛午睡時他吃了奶，掃完風正想睡時，無耐又到我起來，眼睏的他也頂著到差不多走才睡著。表弟的表情可多呢！
Gabby篇：
話說表弟回家去，我便到樓下商場上音樂啟蒙班。今天第一次由爸爸陪上堂，放學後媽媽來接我們打算帶我去剪頭髮，但途中遇上了Gabby，於是改為一起晚飯去了！在Pizza屋食飯跳跳跳，跟半多年前一起在名古屋吃飯已兩個樣。飯後還去了吉豬島玩玩，幾本上所有遊戲都玩過了，
最有趣的是，當機動遊戲停下來時，兩個小朋友都好自然地一人一邊轉身便走下來，很攪笑！最後，還跑了大半個商場，係商場都流哂汗的，都應該得呢兩位小朋友了！

6月11日

2010-06-13T02:07:00.002+08:00

這天晚上，是爸爸、姑姐、三叔和孻叔們約太女麻晚飯的日子。由於上月太女麻和孻叔生日(他們舊曆是同日的啊！)，但那時孻叔不在香港，於是差不多一個月後才出來吃。同席還有二叔公、二叔婆、三嬸，還有Icy姐姐。

即使是已經吃了飯的我，還有吃了飯的太女麻(當晚孻晚到老人宿舍帶太女麻出來吃飯才驚覺原來大家約來約去，竟漏了約太女麻)，大家都吃了很多很多。

當晚還坐了兩架不同的車車，一架是Icy姐姐的，一架是三叔的，原來除了的士，還有些不同的車車架喎！哈哈~~

My Anna

2010-06-13T02:04:00.002+08:00

她是我的好朋友，她的由來，請再三耐心等候去年11月的名古屋遊記時再解說。但話說6月7日晚爸爸當陪訓員的那夜，溍溍說：「Anna係五歲六十一天」。由此推算，Anna是生於2005年4月8日。經溍溍這一鎚定音，從此的4月8、9、10日，將會是Anna、三姨和爸爸的生日，很密啊！~

病中度過的六月初

2010-06-13T01:39:00.007+08:00

6月依始病病，三天沒返學，第四天燒退了上學去，到下午再回校上跳舞班已經無能源坐左係度，結果一星期有多都係食藥的日子.....
到了星期日，爸爸才有時間帶我到平台玩玩，因為媽媽返工去了！為了健康，行埋石春路添！

閒來無事，拿積木弄了一副電腦來，還加上白色的叉電裝置，靈感應該係來自iphone的了！另一副係視像電話，可有爸爸和媽媽兩款選擇的。

此外，某日爸爸和我沖完涼，浴室中的收音機傳來do-re-mi歌的聲音，好在爸爸之前買了隻日本版(只$15蚊)，於是一連睇左幾晚.......

第二個星期，人就好了很多，但天氣就不大好了！下雨天，恐龍仔雨衣再度出擊，去到11號，是學校567月同學的生日會，便服出席第一次學校的生日會，很興奮(上一個係234月的同學，但剛去了旅行呢！)

媽媽生日

2010-06-02T21:47:00.003+08:00

經過我的2.5歲生日後，6月2日便到媽媽生日，可惜由於媽媽的更期問題，砌蛋榚儀式唯有提早一日在6月1日進行。初期每逢砌蛋榚儀式，溍溍都搶先恐後地霸住有利位置、唱生日歌、許願，還有吹蠟燭，這次都一樣沒有例外。

不過，這兩天身子不舒服，發燒不能上學，醫生說是腸胃炎。今天爸爸在街上碰到Simon叔叔，原來Gabby都病了，還病了多天呢！以下係病中的帶點抑鬱look，cool!

30個月

2010-05-29T08:22:00.006+08:00

30個月，即係2歲半了！今天即興地留了婆婆、大姨和細姨在家吃飯慶祝，爸爸收工趕到太子，買了八方雲集的韮菜餃和韮菜鍋貼，街知巷聞的糯米滋，太興的油雞與燒腩肉，仲有益力多、可樂和吉之島10蚊店的Calpis soda。還加上姐姐原來煮落的飯菜，一枱豐富的食物，還有爸爸溝製的仿和民Calpis soda+益力多特飲和Calpis soda+grade tea特飲。

經過左幾個月的一樣高度，先兩日學校的度高磅重終於有1cm的進展，由89cm升到90cm，重量幾個月內維持在12kg(不過爸媽對手抱住我時一d都唔覺我無重，只覺愈來愈重......) 說話能力愈來愈強，一d都唔似一個2.5歲的小朋友。今個月亦開始了返音樂啟蒙班，不過老師麻麻，但上多左幾堂，興趣都有返多少。

而半個月前，有人突然話好驚洗頭，有時洗濕個頭，成頭泡，點可以唔攪掂佢呢，於是有人唯有被分散注意力的招數啦，又或者強行的手段啦(跟住咪係有人起勢喊囉！)去洗乾淨個頭。某日，有人發現左一個方法去洗頭係唔驚o既.......喂！個頭咁點洗到架？

為慶祝2.5歲的生日，為大家表演一首帶麥兜風味的變奏版《我是茶壺》比大家睇：

拉雜談2

2010-05-27T21:55:00.006+08:00

繼續係以拉雜談為名，精華過去10日8日的逸事，就知道呢期代言人忙定唔忙喇！在返學放學的日子裡，先黎d樣衰衰相做到頭盤，比大家醒一醒神先！

好耐無比人捕捉過起身果一刻放蚊的表情了，不過唔知點解，起身仲放蚊o既，唔通二氧化碳過多？然後係阿童木造型照，攝於起身後坐塔的期間，還要加添一個矇樣的。左下係攝於麥當當，食到無野好食，係度玩叉；而最後一張又係玩到無野好玩，玩攬枕......

除了攪攪震的時間外，也有玩樂兼帶創意的時間，例如利用大姨帶來的大圖畫紙鋪在地上畫畫畫，成了一張長長的圖畫；跟my little paper學習用紙碟、顏色紙和顏色筆做了貓貓面具；還有跟大姨一起造了一些手工帽子等。

係5月21日，除了是佛誕假期，還是爸媽的結婚週年紀念日。活動呢，梗有啦！中午先去了沙田文化博物館玩玩，扮蟹啦(有蝦有蟹衫可以比小朋友穿上跳舞架！)、還有抓子、康樂棋、跳飛機等等和爸媽一起玩，當然，我玩得最耐的還是展廳裡的電子玩具。由於中午才去，未吃午飯，所以玩到2、3點又攰又肚餓，到睇「梨園生輝」展覽時已經作反了，不過爸媽說很好看，唯有遷就下快快看完便去找東西吃。

爸媽去了吃個下午茶餐(因為我去到吃東西的地方喝了枝奶奶就訓著了)，待了成一個鐘等我訓醒，又出發了！之後去了一田百貨，看了童書展和買了新的泳裝，還有泳帽，之後就離開沙田，向旺角出發！爸媽的結婚六週年紀念再次回到帝京酒店，再一次在花月庭吃自助餐(趁我3歲前還免費，很化算啊！)沒吃午飯的我，吃吃吃，對新推出的北海道牛奶布甸+燕窩興趣不大，不過對上一期已推出的燕窩蛋撻就很有興趣，然後還吃了很多，拉麵、橙汁、朱古力生果，還有黑朱古力更吃得津津有味(咁細個竟然鍾意食黑朱古力？？)。不過爸爸說之前很好吃的龍蝦、和牛，還有沒有了火焰雪火後替換上的果汁綿花冰都不大好吃喇！
至於平常返學，如果媽媽不用返早班，都會和爸爸一起帶我上學去。某天，撞到了高年班但都是參加了跳舞表演班的姐姐，她很愛錫我地牽著我的手一起進學校後去！事後，爸媽問那個姐姐叫甚麼名字，我只告訴是袁凱"o者"，或是袁凱玲，或袁凱琳(都是音譯)回應，真正的身份，唔話比大家知，嘻嘻.....

爸爸註：繼李進熙、劉詠喬(後證實原來係男仔)，去到陳子喬喇，亦比爸媽證實係無扎辮的女仔來的，溍溍查實知唔知你d同學係邊個打邊個架？......

拉雜談

2010-05-18T00:00:00.005+08:00

又係因為代言人近日事忙，十日有多無update，今次變成拉雜談啦！自從表弟滿月宴後，日子也都是如常返學放學訓覺食飯啦。

不過中間都有d小枝節啦，例如之前story time讀《客人來了》，入面提及玩波子棋，於是問了爸爸一排咩係波子棋，爸爸最終去了書局買了盒波子棋回來給我，但他說$19一副之餘，質量很差，有些波子不是圓的，有粒仲爛左添。

而大姨又有來了些大畫紙，放在地上畫，很開心。姑姐又送了盒有2呎x3呎那麼大的floor puzzle我玩，是noah's ark的圖畫。近日也愛看copy book，但對撩耳仔還是很抗拒，這天就搶了特登從日本買回來價值成百元的內置LED耳挖當電筒用來照明看書，以免被爸爸撩耳仔。

某日，有人拿了個波來踢，但有姿勢無實際，這些舉腳+踢腳的pose大大話話轉過好多個，時間也過了幾分鐘，可是波還是在地上沒有踢中過。又某日，有人食完飯係度頹訓地下......

昨日，陽光普照的星期日，媽媽返早追夜，姐姐放假，於是爸爸放了仔一天，一日落了三次街，大滿足！晚上媽媽返工前，爸媽還去了投票，但我還有十多年才入得去票站。

爸爸自從在iphone安裝了lomo和polarid apps後，就常由normal影相模式變成lomo和polarid模式。左上是我上第一堂音樂啟蒙班......."前"影的，班上沒得這樣玩，這只是我坐在琴行內的琴上做樣而已。

另外，溍溍語錄又有新意思：

1. 5月8日，沖涼時開著的收音機說：「今日係母親節喎，唔知大家點慶祝呢？」，爸爸於是問溍溍，今日你有無同女麻女麻、婆婆同媽媽講母親節快樂呀？.....然後，有人說：「爸爸，咁有親節又有咩架？」

2. 我有同學叫陳子喬(音譯)呀，佢長頭髮扎瓣架。(承上回)爸爸問：「咁劉詠喬呢？」溍：「佢無扎瓣架！」......後來知道，原來劉詠喬係......男仔黎o既！

表弟彌月之喜

2010-05-06T22:48:00.003+08:00

2010年5月5日，4月4日出世的表弟的彌月宴。簡單而隆重地在青衣一間酒樓內舉行，席上有表弟的女麻女麻一家和婆婆一家(又即係我婆婆一家啦)。表弟現已正式命名為浩堯，但在這之前我是建議浩賢的。右下那張相是我趁表弟訓著覺時影的，雖然帶點鬆郁朦，但那才是我這種大師的風格嘛！

同場加映之一：
未去彌月宴之前，在家中玩神奇筆筆，我畫了一個人，那是我的......

爸爸的答案：
未知真相前 ~ 羅茲威爾呀！？哈~~
知道真相後 ~ 喂，有無攪錯呀！

同場加映之二：

以下為溍和爸的枕邊對話：
爸：咦，你返工有兩個好朋友喎！李進熙(音譯)同劉詠喬(音譯)喎！*
溍：係呀！
爸：劉詠喬靚唔靚女架？
溍：靚！
爸：劉詠喬頭髮長唔長架？
溍：長！
爸：咁你鍾唔鍾意劉詠喬架？
溍：鍾意呀！
爸：咁李進熙呢？
溍：唔鍾意呀！
爸：你鍾意女仔唔鍾意男仔架？
溍：唔係呀，男仔臭臭呀嘛！
爸：啊~？！

*查實爸爸兩個同學仔都未見過架喎，係聽返媽媽講咋！

超越30000人次

2010-05-06T22:41:00.004+08:00

2010年5月6日，48cm突破30000人次瀏覽，可喜可賀！特別選左近期懶型插哂褲袋的相片為第13代banner。

(2010.05.06~2010.08.28)

可惜的是，爸爸只capture到第30001個的畫面，不知第30000位幸運兒是誰呢？

開國大典

2010-05-03T20:24:00.008+08:00

2010年5月2日星期七，爸爸公司的開國大典，唔係返工的返工日。有人為左呢個唔係返工的返工日，唯有帶埋d小朋友返工；亦有人為左獻媚，三十幾斤重"污糟"野橫陳在公司門口(對某教派而言)，明明收哂風佢唔返但係都返左呢日工。

由於媽媽返工，爸爸於是帶了我回中環做個「一日會社員」。港鐵到中環，只是行一個街口，今天要很費力，沿途d"姐姐"多到呢，仲有n個pxxw的唔知佢講咩英文但又同d"姐姐"溝通到的sales哥哥姐姐賣電話咭。

返到公司無耐，開國大典儀式進行，我就趁呢個時間，同果隻唔知係咪唔記得塗太陽油而比太陽伯伯晒到濃o既豬豬影相，好慘呀佢，同我咁上下重咁上下大，咁就晒喜左喇！

當其他人掛食晒濃豬o既時候，身為「一日會社員」，梗係要開下工先得喇！呢一樣亦應該今日返黎o既目的之一喇！

呢位就係我o既女波士，淳姐喇！但佢話唔想露面，不過爸爸話咁先夠型，所以先影左張露少少o既！

淳姐就係坐係我隔離位，企係佢隔離果個就係admin個欣姐喇！

至於我呢d二打六，返工都係督下計數機，睇住48cm呢個卜，食下朱古力，咁就一日架喇！

p.s. 呢d係咪所謂o既將來呢，朽叔？

契妹

2010-05-02T00:03:00.005+08:00

5月1日，勞動節假期，正如時間配合，便相約了Christine姨姨一家和Freda姨姨一起入屯門探契媽，當然主角就係我o既契妹喇！與阡A姐姐和T宏弟弟差不多有成年無見，T宏弟弟只比我矮少一丁點，而重量相若，但我比他大九個月的啊！

今天剛好是十二朝，除了看契妹，還有薑醋吃。爸媽說薑醋好吃，相信契妹會是個乖孩子。

看過契妹，契爺說不如落平台玩玩，於是3個爸帶著4個孩子到平台玩玩。身為大家姐的阡A姐姐，從遊戲中展現了她的大家姐風範來。汗水過後，契爺還請了大家吃麥當當。

以下，相信係無論BB或者成人，最hea的睡眠姿勢~~ 多謝契妹作模特兒示範！

29個月

2010-04-29T09:32:00.006+08:00

2010年4月28日，可換算成溍曆兩年五個月，上月發生了兩年大事，就係表弟和契妹出世了。

日子如常，星期一至五返學，星期五下午再回校上跳舞表演班，所以成日係屋企跳跳扎。而家係屋企又成日會唱返學校教的歌，不過又周時故意去改d歌詞。現在念口簧可以讀哂《三字經》的人之初到斷機柕，李白的《靜夜思》，仲有唱《唐詩家族》的《詠鵝》和《尋隱者不遇》等。ABC方面，除了ABC，一邊串生字佢可以一邊逐個字寫出來，不過唔識就位，寫到無位就跳到四圍都係(之前寫左Super Market，phone爸睇得出喇！)就係咁喇。講說話分得你我佢，唔該咩咩，唔該物物都識得講。

高度體重變化不大，不過鼻敏感，氣管敏感都出哂黎，又惹蚊，最近先比蚊釘到一粒二粒。

扮野

2010-04-25T21:13:00.002+08:00

星期六無咩節目，爸爸在家中上網，看到Vicky姨姨在comments N年前我放在facebook的頭像相，於是一起翻看了過去兩年多的facebook頭像相。看到其中一相，大家話不如扮下囉，點知有人又肯喎！於是......

(左上圖經翻查是2007年12月4日拍的，即出世後七天，餘下的是兩歲四個月零廿七日的，即是相差兩年四個月廿日囉！)

附加：

下午和爸爸看書，玩起串字來，於是溍溍拿來畫板來，爸爸邊串，溍溍邊寫，可惜一寫到無位接下去溍溍就亂找位寫，大家估下溍溍寫左咩字？(字的右上角是爸爸的註解)

氣溫19度

2010-04-23T09:42:00.002+08:00

冷鋒來訪，氣溫從2x度跌到19度，唯有再次拿出冬季校服來，否則夏天那兩條短褲仔真係頂唔順喇！噚日hop、hop、hop，今日又有新花臣，就係fly、fly、fly喇！一條長走廊，行極都唔完咁！

氣溫26度

2010-04-22T09:37:00.004+08:00

換季的第四天，仍然有不少同學仔以行動來抗議(查實懷疑緊係咪慳錢無買夏季校服)，不過我仍然遵守規則，只是外出時會添上一件風褸保暖，事關6號C巴士冷氣都唔弱。

今日出門有人扮免仔，Hop、Hop、Hop，好在預早時間o者，唔係就趕到氣咳喇！(雖然兩日都有追6號C，不過爸爸跑之嘛！)

氣溫22度

2010-04-20T09:44:00.003+08:00

今日氣溫比昨天高1度，夏季校服的穿衣表上今天輪到運動服了！由於氣溫還是不太高，上身還是保險一點添上校服之一的冷衫，有點像少女期的姐姐們，穿起來帶點含蓄，但最重要還是保暖作用嘛！

上學去，身邊還有不少同學還是整齊的冬季校，唔通連幼兒園也和爸爸媽媽返工的情況一樣，永遠是「守規矩的人阿福了！」噢！~~

氣溫21度

2010-04-19T09:48:00.001+08:00

4月19日，手冊上註明換夏季校服的日子，一三五穿校服，二四穿運動服。可惜今日氣溫只得21度，卒之出門之後，看到同學仔們身上還是冬季校服多。雖然大家都只是幾歲的小朋友，但規定就是規定啊！

Lomo@平台 + 神奇畫筆

2010-04-18T13:11:00.005+08:00

屋企樓下平台的遊樂設備，已經玩得好熟，最近仲可以自己由地面爬到滑梯再滑返落黎，完全唔係人幫手。有時遇著一些好玩的哥哥姐姐(通常4-5歲果d，特別係有細佬妹果d)會叫埋我一齊玩，於是一路追一路玩，阿爸阿媽係邊都未必記得。

以下係爸爸用iphone apps拍的lomo相，顏色幾得意。

爸爸執拾東西，找到之前李小B姐姐送的Thomas神奇畫筆，由於屋企玩具不少，爸媽都不會一次過開哂出黎比我玩，會逐少逐少咁開出黎。

神奇畫筆開封了！只要用清水，就可以係神奇畫布畫畫，又唔使抹，而爸爸已經千叮萬囑要分開神奇畫筆同蠟筆原子筆要係不同的地方才能用，唔係呢.....嘿嘿.....開筆先黎個簽名，以宣示主權！

然後寫下1234....爸：「咦，點解十係01架？」1-10都寫得好好，但原來寫10就調轉左，但寫到11-13又ok喎！神奇！仲有呢，神奇畫筆好神奇架，爸爸話：「神奇筆筆會攰左就返屋企訓覺架喇！要訓醒先有得再玩架！」溍：「哦？......」

夏之制服誘惑

2010-04-13T03:58:00.002+08:00

今天學校派發了夏季校服，因為下星期一便換季了！由於我是1月才插班的，所以這款式的校服還是第一次穿上(大約只著3個月而已)。左面是運動服，右面是夏季校服。

復活節假的最後週末

2010-04-13T03:39:00.004+08:00

為期10天的復活節及清明節假期好快又黎到尾聲喇！日日訓得晏一晏的日子，最後的兩天正好是週末，如何渡過呢？

4月10日星期六，爸爸生日，正午先和媽媽落街買蛋榚，我選了個魔鬼蛋榚(媽媽說查實以為係選個蛋榚比自己，所以選了這一個，而有人以為呢個係佢o既，櫥櫃入面白色果個係爸爸o既)，然後回家等爸爸放工。今日除了是爸爸生日，還有約了臨盆在即的契媽和過多幾個月又帶一個妹妹黎的洗姨姨多聚一會，因為下次再見時，契妹已經出世喇！

嘉駿哥哥先到，於是一起玩Thomas，原來佢屋企有好多路軌，仲有好多架車添！由於有嘉駿哥哥的關係，今次d路軌砌得又大又長。待契媽同希希哥哥到來，玩多一陣便到切蛋榚時間！爸：「喂，點解呢個小朋友企左主角位，又許願又吹埋蠟燭架！家下係爸爸生日喎！」
晚上在家中一起吃飯，又玩拋波，又玩扮動物扮花，仲騎埋牛牛添！直到晚上九點幾，又要時候講拜拜！經過上次開口中(一半)講中表弟3號會出世，臨走摸摸契媽肚皮同契妹say goodbye，但今次毫無預言，莫非男女授受不親，過不到料？

4月11日星期日，媽媽要返工，並吩咐爸爸今日不要給我訓晏覺，以免夜夜唔訓攪到第二朝返學唔願起身。於是爸爸下午起便進行「放電」安排。先到平台玩吹波波和滑梯，仲有姐姐撩我玩吹波波添！之後爸爸本想去深水埗買東西直到晚飯才回家，由於大矇爸爸關了房門才記得鎖匙還在房內，於是call了婆婆求救，婆婆派出大姨帶來鎖匙開門，等我可以早點返房訓覺，否則等媽媽收工回來要成晚上11點了！

於是，爸爸帶了我去上次大姨帶過我去的運動場跑步。由於我第二次去(爸爸才第一次，雖然果度係望到屋企咁近)，所以一進場我就一枝箭衝進跑道去。不過大約跑了半個圈(約200米)就停了下攪攪震了！知道大姨會來，於是坐下來先休息，等大姨黎到再跑了一圈，今次破了上次記錄，即是共跑了600米囉！

黃昏時份，回家吃了半個蛋撻又飲了些爸爸的巧克力珍珠奶茶(爸爸不肯給我吃杯底的珍珠啊！)，然後吃飯沖涼，再看看VCD，訓覺去是也！

探表弟+三姨生日+三叔擺酒

2010-04-10T02:08:00.006+08:00

2010年4月9日，第一次去見表弟，同樣地，婆婆查實亦係表弟出世後第一次見面。第一次抱住兩個孫仔，婆婆梗係笑到見牙唔見眼喇！同為婆婆的孫子，婆婆兩個都錫哂，無需較量，不過我地選擇左"較腳"，28個月vs6日的腳，真係相差好遠的。

然後抱過表弟兼錫錫佢後，輪到同三姨慶祝生日時間，表弟無得食，唯有放返係佢張bb床上喇。同三姨唱完生日歌、吹完蠟燭同食完蛋榚過後，要去第二場喇！

是日第二場，三叔擺酒大喜之日是也。太女麻、二叔婆等等....影左唔少相。到酒席時間，我都食左唔少野，乳豬、蝦、鮑魚、魚........好多好多。不過，後尾我話要掂下掛得高高的水晶燈，爸爸放下重重的相機帶我去掂時，我竟然.......捉住其中一條吊飾唔放，爸爸叫極我都係唔放，連三叔個外父大人都企埋出黎都唔放，卒之.......整斷左！攪到爸爸即時無需預警直上5級大火，連身處後場的孻叔事後亦說佢咁遠都聽到爸爸開緊拖......

係度祝表弟快高長大、三姨心想事成、三叔和三嬸永結同心！

疲累的一天

2010-04-07T23:53:00.003+08:00

2010年4月6日，5天復活節長假的最後一天，媽媽返工，爸爸早上帶了我回沙田女麻女麻度，然後下午與媽媽在九龍塘會合回家。已經抱了我一個早上(有消息指出，有人成日唔願落地行)的爸爸，諗住我可以陪媽媽訓覺(媽媽夜晚要返通宵班)，點知跳呀跳呀，我唔訓覺呀！一心可以輕鬆出街購物的爸爸唯有帶著我出街。

目的地本來是深水埗，不過有人上了6C巴士，開頭還一邊傾計，點知去到保安道街市那邊，咦，無聲o既，原來有人訓著左。抱住個剛訓左o既小肥豬，睇野又唔係，買野又唔掂，於是爸爸唯有即興改動行程，但去邊好呢？巴士總站在無野好睇的九龍城碼頭，於是......爸爸決定比我繼續訓，過了深水埗，經過太子、旺角、油麻地......途中邊用iphone上網找下那處下車才好。最後選了在土瓜灣下車，目的地是信興隆買榚榚給媽媽做night food。可惜現實正如網上消息一樣，5點過後缽仔榚已經「品切」了，於是買了西米榚和茶果，可是，此刻有人仲係軟林林地被抱著訓覺。

直至去到土瓜灣街市爸爸碰到幼溍同學的爸媽而交談時才醒來。醒後郁來郁去更難抱，卒之去到亞皆老街公園，有人掛住玩唔願走，仲第一次無人扶著爬到高一高，以後要多加注意了！半拖半拉下離開公園，卒之移動到福老村道，去了Cookies Quartet買了蝴蝶酥和貝殼曲奇，還專程飛的士去醫院送給仍未出院的三姨和探病中又無得睇表弟的婆婆和大姨吃。

最後，雙手極疲累的爸爸從袋中豪出了十四蚊給小巴司機叔叔，還說：「頂唔順喇，唔該兩個位！」後，有個叉飽電又玩飽的人快快樂樂地回家去......

清明節

2010-04-06T02:41:00.002+08:00

復活節、兒童節後又到清明節，節日何其多，不過媽媽放完假要返工了！

早上起身開了playhouse玩，今次媽媽還第一次批准我在playhouse上畫畫添。中午去屋企樓下大家樂食飯，然後媽媽返工，爸爸陪我玩陪我訓晏覺。黃昏時份落了平台踩單車，遇上B室的文迪哥哥，平日踩單車到平台見滑梯同搖搖板便放下單車不理的我，今日竟然跟著文迪哥哥「車尾」踩左差不多成個鐘單車，不過所謂踩，查實即係爸爸係後面推...... 文迪哥哥仲同我行埋石春路，好好玩。

以下，係示範溍式踩單車法：

復活節+兒童節

2010-04-05T01:17:00.005+08:00

2010年4月3日，今天媽媽跟大姨細姨去拜公公，氣管差的我和爸爸就直接到婆婆家去。現代的小朋友真係分分鐘幾廿萬上落，一路搭港鐵也爭取時間在iphone上篤篤篤...... 今天由出門到晚上常遇上一些名人，從荔枝角到太子的港鐵上，就遇上李永達議員在隔鄰，晚上吃飯鄰卓又有杜國威老師。不過，怎也不及在上星期日給溍溍開口3號出世的表弟來頭勁，仲給講中了(雖然事後要補一句"差點兒")！4月3日清晨5時許，三姨穿羊水了，即是表示表弟要提早到來了！(預產期是13號啊！)

p.s. 右下圖：今春Earth Music & Ecology新裝一件示範(http://www.earth1999-netshop.jp/fs/earth/kids/11101H90000)
2010年4月4日，兒童節......以後應記著這是表弟的生日才對。經事後爸媽腦海中回帶記憶，當日溍溍對三姨說3號，三姨好像說"我覺得4號兒童節好d喎！"，卒之開口中！表弟待到4月4日清晨5點幾才出世，我做表哥喇！由於探病時間只有黃昏6-8時，早上先和爸媽到麥當當吃早餐，還換了個麥當奴叔叔回來，然後在平台玩了一大餐，再一家三口到樓下商場剪頭髮去。今次溍溍無喊了！不過表情生硬，剪完個靚仔頭仲好似d阿太咁抽住個袋行街添！由於爸爸和萊叔有東西交換，今天萊叔和萊嬸嬸帶了b朗來同一間salon剪頭髮，不過他就喊到飛起，連我去唱ABC songs逗他也只顧忙著喊。

之後和b朗一起去了吉豬島玩遊戲，玩慣玩熟的我一去到門口已經叫著"去玩野喇！"，反而b朗還很怕醜，亦沒太大興趣玩，萊叔快d換返一百幾廿萬代幣比b朗習慣下先得架！嘻嘻~~黃昏時份出發去我出世o既地方廣華醫院去看表弟喇！由於我年紀尚少，不能進病房，所以只好由爸媽代表去看三姨，可惜，表弟因要打抗生素，要在N8病房，那裡守門口的姨姨說只准爸媽內進，連表弟媽媽的媽媽即是婆婆也大叫掃興。於是，只好從三姨丈的相機中一睹表弟的第一手相片和影片，表弟眼大大，鼻子也不小。然後便跟婆婆一起去晚飯了，一連兩日跟婆婆一起晚飯，婆婆開心到不得了呢！

最後，爸爸說一定要借點地方來說幾句，以下就交比爸爸了！

爸：「係......我想講果幾句全因S9(南九)病房看門那位阿姐而起，佢身為阿姐，堅守崗位絕對是值得稱讚的，但那種待人態度，我好想好想好想投訴妳呀！妳果種自以為是的態度和加諸於探訪人士的說話，我入去換人又話要目及住我，外母係入面出黎望下外面仲有咩人黎左又話出左唔好再入去，姨仔再入去又話你入過一次喇喎，我翻看哂所有在S9病房外的告示，包括給探訪人士的須知都無妳把口講o既規矩要求。個個黎到呢度，都係開開心心探望即將生產/生產完的家人親屬，妳咁o既態度，算係咩意思！講完......」

錦田鄉村俱樂部

2010-04-03T00:42:00.006+08:00

2010年4月2日，復活節5天長假的第一天，剛好爸媽也放假，又難得算早起床(8點幾)，於是決定怎也想下搵街去，可惜攪同阿邊個換衫，一攪又攪到近11點。曾經找過契媽看看有沒有節目，可惜原來有節目在先，於是和爸媽無目的的出街去。想呀想，卒之決定到黃埔去，上了30X巴士的途中，契媽來電話ok喎，仲打算去摘士多啤梨添！由於都成12點，巴士又去到油麻地，速速落車搵野食。

午飯選了就近的美都餐室，由於客人不多，我這個嘈嘈閉的小客人逗得d閣樓d樓面哥哥姐姐好開心，不過可能剛遇上樓下d師傅午飯，等候期間又拿了爸爸部iphone篤篤篤...... 食飽喇！飛港鐵到錦上路，點知......落雨呀！
逛了一圈跳蚤市場，契媽契爺和希希哥哥都黎到喇！先買了件咸蛋超人雨衣，就乘的士去摘士多啤梨的地方，原來係錦田鄉村俱樂部。希希哥哥說肚餓，於是先去了吃豆腐花和燒賣，期間天空黑了起來，很大雨啊！不過兩個小朋友正進入叉電模式，雨再大也沒問題，最好落一陣勁o既，等陣間玩時無咩雨。

叉電完成後也差不多4點鐘，雨停下了！於是先到主菜的摘士多啤梨，與其說摘，應是說剪，因為種在田中的士多啤梨不能即吃，只是提著籃子到田中去剪，然後拿到櫃位磅，幾十蚊一磅的說。剛好和希希哥哥各剪了13粒，承惠$40。

然後契爺帶著去了摘蕃茄，又買了些蕃薯，而賣菜的嬸嬸強力推介菜心，還有油麥菜。契媽說上次來買了油麥菜，那些油麥菜很有油麥菜味的。

雖然天空時而有點雨，但仍在大草地上玩bubbles，還有竹蜻蜓，爸爸原來不懂玩，被竹蜻蜓打得手指痛。時間去到5點鐘，向燒烤場進發！4大1小，我仲矮仔唔使錢，起爐BBQ是也！燒烤的主力，當然是爸爸和契爺喇，我和希希哥哥吃了多少就又跑到草地去玩玩了！轉頭又回來吃點東西，還有跟媽媽和契媽玩玩。

差不多9點才離開，再乘小巴回到錦上路港鐵站。由來到錦上路起，到再次返回錦上路，全程使費由契爺包起，多謝哂啊！等契妹19號出世後，大家再玩玩啊！

跑步

2010-04-02T03:02:00.002+08:00

2010年3月31日，媽媽和大姨帶我去了長沙灣運動場跑步，仲跑左成400M添！回一回氣先..... 吓吓...

Easter Eggs

2010-03-30T00:53:00.005+08:00

媽媽今個星期放假，上星期跟大姨行街時買了些發泡膠蛋蛋返黎，教我製作Easter Egg。有彩繒的，有貼紙碎的，Happy Easter holiday！

28個月

2010-03-28T23:51:00.002+08:00

2010年3月28日，係溍溍28個月的日子。而家行行走走絕對無問題，仲周不時run run run，在家又愛攀高。說話把口簡直超哂齡，"分別"、"因為"、"所以"等抽象一點的用語也會說出口，仲成日話自己係大人，爸爸媽媽係小朋友。可惜片片仍未戒到，仍需努力。

過去四個月去了兩次日本，唔係爸媽發左，係遲下返幼稚園就只好high season去，好貴啊！

家下身高89cm，體重12kg，爸媽抱起也很快叫好重呀！bb車都快唔o岩坐喇。

青衣公園

2010-03-28T23:42:00.003+08:00

回來了！上星期日(21日)從東京回來，7日東京遊的遊記，即將發放。

玩完又上學，好快又到週末了！今天爸媽帶了我去青衣公園，因為離家不遠，又未去過，而且青衣城又有得行街。話說自從東京之旅爸爸給我玩iphone後，2日就學會點玩點用，而家即使比媽媽鬧，都會問爸爸借黎玩。
放下iphone，在好天氣的日子在公園跑跑，人都精神d，難為爸爸次次都比蚊咬到腫左。入到商場，剛好有個職業性失聰的活動進行，有個公仔人物係度，我除了主動行埋去握手，轉個頭再行埋去，仲同佢抱抱添，幾friend呀！

行完青衣城後去了探三姨，表弟快要出世了！今日溍溍開口說表弟3號出世(預產期4月13號喎！)，第二口跟爸爸說了9號(果日三姨生日喎！)，又睇下中唔中？好快，又多個BB一齊玩啦！

出發！東京去~

2010-03-15T02:06:00.002+08:00

近日代言人繼續事忙中，但由於僅三兩星期前接到order，卒之邊忙邊安排，直至上星期四才買下機票、換錢、找酒店，大約八小時後就向東京出發！在未來一週間，如有時間將會盡快更新blog帶給大家東京最新情報。

職業訓練之表哥篇

2010-03-07T23:05:00.002+08:00

仲有一個月多d，溍溍就會榮升表哥。星期六下午，婆婆、爸爸和溍溍在家，進行了一次照顧表弟的特訓，首先係抱，算合格喇！

然後係換片......點知溍溍一聽到話換片，即刻飛身入房拎整平日婆婆幫佢換片時要用的工具，棉花、vaseline、片片，仲有尿布墊，仲要大家幫佢係sofa set到同佢平時換片一樣。除bb褲仔、拎棉花抹抹，仲要幫bb塗vaseline，一直要婆婆幫手hold住bb雙腳，再然後係著片，攪到婆婆笑到喊。

新歌速遞+my first letter

2010-03-06T02:02:00.004+08:00

英文版的《I'm a little teapot》在很早期看的碟碟已看過。讀書後，學校教了溍溍唱中文版，即
管黎表演給大家先！

此外，今日媽媽晚飯時，溍溍遞了張紙條給媽媽，說：「我識寫個B字呀！」，大家又睇下合唔合格？

溍溍與神奇皮帶

2010-03-04T09:36:00.002+08:00

以下是節錄近日出自溍溍口中的說話(如看倌覺得好笑，亦可當作笑話啊~~)

1. 《溍溍與神奇皮帶》

話說某朝爸爸與溍溍一起換衫返學返工，溍溍看到爸爸的皮帶，覺得很有趣，於是拿上手把玩。當然，對於仍是著橡筋褲頭的溍溍來說，這只是一條黑漆漆的東東，一邊尖尖的，一邊有個銀色的物體。

到溍溍換好衫後，爸爸也穿著好，要掛上皮帶喇，皮帶從一邊的褲上扣子穿過一個再一個，然後繞了一圈穿過那銀色的東東後，看得眼瞪口呆的溍溍如是說：「好神奇啊！~~」。

從此，爸爸的皮帶便成為了神奇皮帶，快快樂樂地掛在爸爸的肥腰上去。

2. 《我唔要big，我要small》

又話說某日早上，溍溍因為近日都有流鼻水，有時睡醒了鼻孔裡有機會有乾了的鼻水結成的鼻C。不懂「採鑛」、亦不覺得有鼻C係鼻鼻入面，還有都幾怕人攪佢面面的溍溍，這個為免有損市容的任務，當然由爸爸進行喇！

由於都幾乾身下，又靠近「洞口」，於是爸爸舉起他的左手食指就往洞口去。說時遲，那時快，溍溍雙手一伸，爸爸的左手即時動彈不得被溍溍雙手捉緊。在這個膠著的狀態下，爸爸正打算講和求去，此時溍溍說：「我唔要big，我要small。」，於是爸爸的左手在溍溍雙手的牽制下迅速收起食指，然後彈出尾指。如是者，爸爸的左手尾指終於可以去「採鑛」啦！

p.s. 溍：「爸爸你洗左手未呀？」

3. 《bubu何處去？》

又又話說有一日爸爸帶溍溍上廁所，因為溍溍肚硬硬，應該係有便便係肚肚啦！於是爸爸叫溍溍痾bubu係馬桶喇，仲講返佢細個試過係浴缸沖沖下涼痾bubu，攪到爸爸要執C。

坐在馬桶上的溍溍聽到話佢曾經係浴缸bubu，於是拍著浴缸說「我要痾係呢度！」，爸爸當然說不，然後說：「要痾係馬桶度呀！」接著，溍溍指著白色的水桶、藍色的水桶、白色的盆、橙色的盆，還有另一邊的污衣籃繼續重覆說著「我要痾係呢度！」，好不奈煩的爸爸於是指著溍溍的手心說：「咁你要痾就痾係呢度喇！」溍溍接著說：「痾係呢度，痾係呢度，跟住拋拋拋，拋到好高......哈哈哈~~」沒好氣的爸爸只好靜靜地繼續做其「伴C僮」......

p.s. 爸：「溍溍你玩咁耐都仲未bu喎！」

27個月

2010-03-01T01:19:00.006+08:00

上學已經有1個多月了，病假了兩次，亦沒有抗拒上學。2月26日，還參加了學校的舞蹈表演班，可惜媽媽不能一起上，回家只好由我來示範，踏踏腳、叉叉腰、1234......

口齒越來越厲害，懂得分辦幾時要做大人，幾時要做小朋友。例如拿一些一早已教著要大人才能拿的東西時，會說「溍溍係大人」，但要玩時「溍溍係小朋友」。口中亦常爆出一些唔知幾時學，但又講得很清楚的說話，「大吉利是」、「一腳踢你去大西洋」、「好神奇呀！」、「五時花六時變」......多不勝數，驚喜無窮，小腦袋裡究竟是想著甚麼的事情呢？

高度沒大變化，體重大約28磅。出街也愛扮有型，例如插褲袋......

今日亦是元宵節，亦係埋數的日期，今年沒有出外拜年，利是的厚度竟和爸媽收的只是平排厚度，經點算過後，就少過爸媽20%。今年自己也有幫手拆利是，爸媽還教了我10蚊、20蚊、50蚊和100蚊係點樣的。好似有d大面額d架喎，各位叔叔姨姨，教下我喇！ hehee......

初四至十五

2010-03-01T00:47:00.006+08:00

由於農曆年前病左，年假後只有返學放學屋企，沒有任何拜年活動進行過。期間，初四那天太女麻在老人宿舍暈倒入了醫院，爸媽一連幾天也要收工後到醫院去探望，好在太女麻住了幾天醫院檢查過後已沒事出醫了。此外是初八那天契爺契媽來過我家拜年。

零碎的事還有家中印姐姐生日，但有小插曲是爸爸翻查確認姐姐邊日先係生日時發現姐姐本護照5月到期，而那個working visa亦是(但合約是到2012年2月嘛！)，可幸是還有時間去弄好事情，但作為請工人新手的爸媽，對於本來蠻滿意的那個agent公司，變成不滿意了！
天氣變來變去，本來好返好多的身子，這幾天又是勁流鼻水，於是28日爸媽趁星期天帶了我去天水圍濕地公園玩玩，希望吸多點新鮮空氣。入到公園，第一樣玩玩的，係去左玩沙樽，$20一個小樽，有位哥哥專人教我將不同顏色的沙入到小樽裡，完成後還可拿回家去給婆婆看。然後到戶外逛逛，有花有草有魚有鳥有蟹，可惜鼻水還是照流，狀態不佳。

午飯過後，一直留在室內玩到4點左右才離開，夠哂皮喇！

p.s.相片爸爸代註：右上-幫媽媽影相的，似模似樣，但相最後還是拍不到；右中-從胡主席夫人捐贈濕地公園的幾台望遠鏡中幾間艱難拍下的影像；公園內的食店，窗邊的位置很正，而每張枱面都貼了Please serve yourself, thank you. 可是常常有人叫"阿姐，唔該執執枱"......