情人節

剛過去的2月14日係情人節，亦係我小凱溍有爸媽陪伴下的第一個情人節，今日爸爸仲請左大假陪我添。

不過，原來今日係我打針針的日子，肺炎鏈球菌的第一針，因為講明會有發燒等副作用，所以媽媽擔心我會扭計，爸爸亦因此而請假。

今日去到診所，係等候期間同一個四個月，一個六個月的bb溝通下，交換下情報(呢方面梗係爸媽做喇)。之但係最離譜的係有兩個歲零的哥哥，一個據佢婆婆請附近的媽媽講佢傷風又喉嚨發炎，另一個係唔知做咩咁興奮。呢兩個哥哥係診所內走來走去，好病果一個又唔知點解仲咁好精力，四圍走，佢婆婆媽媽又唔管束佢，好驚驚，d菌會唔會四圍走？而好興奮果一個唔知做咩突然由診所頭跑到診所尾咁飛撲過黎，好彩爸爸眼明腳快用雙腳夾住佢，唔係的話佢就撞埋我度喇！

攪左差不多一個鐘，就輪到我入醫生房打針了。今次都唔係第一次睇醫生，亦都唔係第一次打針(第一針一出世就打了，乙肝第一針和打卡介苗)，但呢一次有預告會有副作用嘛，所以爸媽都緊張。爸爸和護士姐姐負責捉住我隻腳仔，醫生叔叔就負責打針。針一拮，我當然係"嘩"一聲就喊起黎，不過喊左一小陣，出到診所無耐已經無左回事，只剩下脾脾上的小膠布而已。

打針後回家，唔知點解吐了一次奶，但無發燒。到左第二日，我終於有輕微發燒，仲又吐了一次奶添。雖然今日爸爸要返工，興幸媽媽仲係屋企，好好咁照顧我，仲有退熱貼我用添！