第100日

不經意已到了第100日，繼續「高..高..高...」就梗係理所當然喇！而我亦剛達成60cm的高度指標了，60cm即係兩呎，勁呀！

回顧這100日，我從媽媽的肚仔出來咩都唔識，到現在我已經可以做到好多動作，仲有一d技能，包括：

認人：雖然唔係好叻，但都認得到下架！仲有我的視線範圍已經越望越遠了！

追蹤：無相機d face detection功能咁強，但都可以跟住爸媽的走動而略作追蹤位置了，但先決條件係一定唔可以開電視。如果唔係，我第一時間就係擰去睇電視。而我對鏡頭都幾敏感架！

觸摸：雖唔係次次都中，但而家都有同爸媽久不久give me five，摸到架！爸媽抱埋身時，我仲識主動摸佢地塊面添！

抓：未識抓住d玩具，但爸媽抱埋身，都會好多時抓住佢地心口d衫。

轉身：仲未曉轉身，趴係度抬高頭呢個動作未係咁理想，每日特訓中...

發聲：近日成日o依o依呀呀，爸或媽打電話返屋企都會傾下兩句架，不過佢地唔知我講咩之嘛！