終極？

爸爸說，有時d人攪到無野好攪，就會叫做「終極」。例如有一d爛賭的叔叔，賭到最後果一蚊都去賭，會叫做「終極一擊」；又例如有一d明星姨姨，山窮水盡會去「終極一脫」。



今日黎到我身為BB的第11個月零31日，爸爸說想為我一歲前的最後一篇Yesterday One More寫一篇「終極一脫」，就係講沖涼。

話說我在出世後2日，即係11月30日晚出院回家。到12月1日，在家中生活的第一日，由陪月姐姐Angela為我洗了在家中的第一個白白。大家睇睇，我當日幾細粒！

12月2日，因為星期日的關係，Angela姐姐放假。對於新手的爸媽來說，雖然之前上嬰兒護理的講座都有教如何幫bb沖涼，但上堂時都係乾水洗bb公仔，仲要係齋睇果隻。如果手上係換成一個細細粒軟綿綿，又會郁又會喊o既bb，果種要落手落腳去幫bb沖涼的第一次，著實係會有無從入手的感覺o既！好在，今日住係隔離屋苑的麗姨姨來探我，仲幫我沖涼涼添！大家睇下，我個臍帶夾仲係度架！
到左12月16日，終於到媽媽出手喇！媽媽示範洗頭絕技一招！

再一個星期後的12月23日，仲於輪到爸爸有機會喇！大家睇下，我係咪好似個公仔咁細粒？

經過咁多個月來的操練，爸媽已經成為熟手技工，而我就更透過係沖涼的時間去展示我的成長。由最初的軟綿綿公仔，無反抗任人舞；到識得坐係盆入面、到按住個盆企係度、捉住浮係水的沖涼玩具、(扮)睇bath book、將玩具丟出盆外、掃浴缸邊的洗頭水、由唔識開浴缸水喉到識得開、由肯訓係度洗頭到掛住玩要由爸媽追住黎洗，再去到近日成日想行出個盆仔度，又或者係浴缸外時伸手玩放在浴缸內那個盆的水......沖涼，絕對係一個既深刻、難忘及親密的親子活動。