特訓

何解要特訓呢？呢d咁沉重、認真的話題，容後才講，先講下這個特訓的過程先。

早餐完畢，執得野黎都正午，今天剛好爸媽都放假，於是選擇了挑戰我自己的香港境內最北之地的極限，由舊紀錄的大學站，推上至大埔。由於去到大埔我剛訓著左，於是爸媽決定先找地方食晏仔，但繞了一圈別無好選擇，麥當當午飯快靚正。突如其來，被隔離再隔離枱其中一個McHKCEEcandidate哥哥打幾個噴嚏嘈醒我(好似係溫書考試但又傾計多過讀書的哥哥姐姐，比來吃東西的還多)，於是我食埋我自攜的午餐才出發去第一個目的地—大埔鐵路博物館。


去到門口大家都係拍拍拍，爸爸都比好多人叫佢幫手拍張合照呀，咁我地都唔執輸，都搵個好人哥哥幫手影返張留念嘛！

之後就去睇火車，仲增添途中行路軌的行程添！好多石石呀！

上到去d古老火車，好多櫈櫈，同坐船船果d一樣可以拍來拍去的。爸爸玩下黑白mode，又幾有feel喎！

見d哥哥姐姐都影唔少呢款相，爸爸都強迫我影返張一樣款的，我交得幾足戲！

行完鐵路博物館，就去了大埔海濱公園。果然有口碑，好多花花，又有好大片草地，加上下午天氣不錯，只可惜已經計劃來玩的爸媽，竟然漏了安排帶地蓆、泡泡槍，又或者波波黎玩，不過小朋友好易話為o者，草地一樣咁好玩；仲有呢，波波同泡泡呢d野，好似玩埋堆之嘛！(溍爸註：溍溍，咪咁口輕輕喎！開頭唔知邊個唔肯踩草地架？)

溍：「叔叔，你做咩影我呀！？」叔叔：「......」

玩左一輪草地，又去第二個位置睇下先。呢度風景好，心情靚，吹個口哨先！(溍媽：「溍溍，做咩你cool到雙手插袋架？」)

時近黃昏，行埋昆蟲館和爸爸拍了一輪花花後，又係時間想晚餐了。最後，爸媽選了帶我去他們當年結婚擺酒的那間酒店食buffet，今日仲要係應節的easter buffer添。坐低，先黎個燕窩蛋撻仔先。

跟住，哦？好大隻老虎蝦！不過爸媽食的，我無份。但我都食菜菜喇、飯飯喇、西湯喇、生果喇......

仲有人手摵的提子，查實d提子，刀切亦可！

另外仲有朱古力生果，仲食到我成個咀咀好似塗左口紅咁添！

食飽無所事事，玩下寫字先！

哈哈，仲有氣球玩！
飲飽食醉，講返今次特訓o既最終目的為咩？個幾月後自有分曉。不過，今日因為係爸爸生日，於是玩足一天吧！

最後，係度借d位補視三姨4月9日生日快樂，happy！仲有，幫爸爸借d位祝和爸爸同日生日的街坊勤勤弟弟1歲生日快樂，臨訓前仲要加埋祝爸爸個中學同學Philip叔叔係今日添了個囡囡，所以祝埋Eva妹妹有個聽教聽話的爸爸。