唔識世界之二

好食好住，仲有咁多人照顧之下，我當然繼續長肉，每次到楊醫生那裡檢查，無論體重和頭圍，手手腳腳的長度等都有進展。有幾次去楊醫生那裡時，夾到爸爸時間可以一齊去，於是除左媽媽外，爸爸都睇到我係我個屋企裡面郁郁貢。有一次，楊醫生照到我個心臟，仲可以比爸爸媽媽睇到4個心室係度縮下縮下，仲間隔清晰添。

如是者到左「有左溍溍的日子第269日」，即係11月27日，那天剛好爸爸因公可留在家晏一點才出門。正當爸爸要夠鐘出門口之際，媽媽大叫「哎呀，有血呀！」，媽媽說這叫做「見紅」，即係我準備出世喇！好在剛剛三姨正在途中去探媽媽。因為係見紅，即係情況並非緊急(如是穿羊水就不同了)，於是媽媽慢慢食埋飯，沖埋涼，本來仲想等埋爸爸收工先入院，不過剛好三姨係度，於是下午便拿著「走佬袋」入院去了。

在這個「第269日」下午4時，媽媽入院了。 那時只是見紅，沒有其他跡象。媽媽被安排最入面的病床；到晚上7時許，媽媽開始感到腹部有痛楚，但不算很痛；到零晨，媽媽開始每7分鐘痛一次，成晚都無訓覺，o係走廊行黎行去。當晚o既護士姨姨話媽媽仍然會笑，應該唔係咁痛喎~

第二天，即係「有左溍溍的日子第270日」，今日陣痛加劇左，中午探病時間婆婆和爸爸黎到探媽媽，媽媽已經痛「嘩嘩」聲，要婆婆和爸爸幫手做下按摩，仲要坐埋fit ball舒緩下痛楚。下午4點幾，媽媽終於痛到死死下，開頭護士姨姨都唔比佢入產房架，到醫生黎睇我媽媽時，先發現子宮頸已經開到4度，卒之去到呢一刻可以入產房了。

當時爸爸都預備左係公司早d閃，但因為熹叔叔正在放假(事關熹叔叔的雅欣姐姐比我早12天出世)，所以即使爸爸在4點半收到媽媽電話通知要入產房了，爸爸還要去青衣拿文件給熹叔叔第二天幫手做。當爸爸在夕陽影照的的士裡，從青衣的熹叔叔家出發去醫院的途中，護士姨姨已經急不及待打電話給爸爸，因為係呢一刻媽媽已經開到9、10度了。

大約10分鐘後，即係黃昏5點35分，爸爸已經到達廣華醫院的北九產房了。在護士姨姨的帶引入，爸爸穿上了白袍，用消毒劑清潔了雙手，就入了N9-DB5。那時媽媽已經訓係產床上，但我仲未出到黎。由於爸爸到左，護士姨姨叫了爸爸企在媽媽身旁，期間問爸爸一d資料作記錄。而爸爸就好曳，學識左睇部量度陣痛o既機後，就係度瓜瓜嘈做埋護士姨姨果份，係陣痛上升時就係度催促媽媽用力。

攪到6點零，護士姨姨都努力催促媽媽自己用力，免得佢要出手剪傷口，不過媽媽都係話好痛：「黎喇，出手喇！」。係媽媽投降的情況下，於是護士姨姨就準備接生，仲開玩笑不如就18點18分，好意頭嘛！全程我個八卦爸爸都係度睇住我個頭仔出左幾多，由最初的大概露左5蚊銀仔咁大的頭頂，到護士姨姨動剪開造口等我易出黎一d果一刻，佢都不時睇住。唔識死的爸爸只係當護士姨姨動剪一刻，佢才縮一縮後，這邊箱一剪完佢又探頭去睇，見到媽媽d血好似水柱咁流出黎佢都唔驚。再過了10多20分鐘，我終於o必咁快就出左世喇！媽媽好叻叻，全程都無聞安桃樂，靠自己的；而爸爸就全程八八卦卦，仲睇埋我比護士姨姨剪我臍帶同檢查跟住流出來的胎盤添！

生產過程完畢，我就比護士姨姨抱了去磅重和打針。我剛好有2.5kg，剛合格無須留院呢！係呢個時間，爸爸就要離開產房先，等護士姨姨幫媽媽縫針。係產房外面，婆婆同姨姨地都係度等緊，仲好緊張咁上網查下星座睇下我係咩性格添！

差不多一個鐘頭後，我和媽媽終於離開產房到東九的產後房休息了。由於剛過了探訪時間，護士姨姨酌情比爸爸、婆婆和姨姨多留一會，但因為護士姨姨要同我檢查和我要先訓溫室暖一暖個身，所以都係緣慳一面了。唔緊要喇，我出世了，以後大把時間見面喇！



溍爸註：雖然寫完第一部份已4個多月，而距離以上的難忘日子已經有170多日，加上在公立醫院出世不能拍下影片或相片作記錄，但這個經歷好深刻，點都會記得！

圖註：左上圖為2007年10月31日，係我未轉身前拍到的最後一張有樣睇的超聲波相片；右下圖為2007年11月29日，我出世後第二日係醫院拍的清晰相片。