我的1歲生日 — 迪士尼樂園篇

切左蛋榚，咁究竟專程放假的爸媽有咩節目比我呢？由於天氣突然轉凍，最凍仲係要今天，卒之由最當然想帶我去海洋公園睇魚魚，臨時改到「相信」會無咁大風的迪士尼樂園去。



去迪士尼要做足準備，係我未出世前jacky哥哥係電視已經咁教落架喇。首先，梗係隊飽我個肚仔，食飽粥粥和奶奶，再叉埋電(訓覺豬)先出發喇！下午2點幾，爸媽除了幫我穿上厚衣，還替我戴上冷帽，ok，出發了！從家中出發去迪士尼，乘港鐵只要5個站，但就要要轉2轉車了！




到達迪士尼，風和日麗，都唔少遊客，仲有唔少bb車行走添！爸爸拎左d錢錢去票務處，轉個頭就換了兩張紙和3副眼鏡回來。進入美國小鎮大街，第一站就係跟據剛才票務員的指示，去左手邊的City Hall拎個生日章。生日章共有四款，係哥哥質來質去之下，當然係拎左最就手的Donald Duck章。不過對於我黎講，拎黎咬好過拎黎勾係衫度。



之後就去排隊同聖誕老人影相，估唔到第一次黎到就要學習排隊文化，大約排左10-15分鐘左右就可以同聖誕老人影相喇。影完相去了坐火車，然後去到樂園的另一邊Fantasy Land落車。

落車後就係小飛象和旋轉木馬，不過係呢個時候，第一樣要做o既係搵洗手間換片片食枝奶奶先！去到一個家庭洗手間，換片的空間麻麻地好，換完都係出去搵張長椅開奶奶食。爸爸就走去買了熱狗和香腸當下午茶。飲飽食醉，去玩喇！第一個項目係旋轉木馬，我雖然無表現得好開心，但一d都唔驚，爸媽都放心得落。之後去玩小飛象，轉呀轉，我仲自己拎枝控制高低o既桿玩，攪到小飛象飛呀飛，高高低低。然之後我就ZZZzzzzz.....左喇！



爸媽係人聲嘈雜之下推左我經過城堡去睇遠觀巡遊，不過因為城堡前有個台阻住，視野麻麻地。巡遊結束後，爸媽推我四圍行，經過小小世界，再去到巴斯光年，不過我仲ZZZzzz....而佢地就食緊綿花糖和焦糖爆谷。訓左大半個鐘，終於wake up喇！爸爸見機不可失，立即去拎了巴斯光年的fast pass，再推返我去小小世界玩。不過小小世界未到，先係大大的迷宮咁大的排隊區內轉來轉去，幾經辛苦，終於去到隻船隻度出發！「人人常歡笑，不要眼淚掉，時時懷希望，dododododo，dodododo~~~」全程八分幾鐘的船程，真係睇到唔停得頭！玩完小小世界去返路口，爸爸見到咖啡杯無咩人，又去玩！初頭驚我會轉得頭暈，點知.....我仲捉住個盤玩得好開心添！

時間剛剛好，再回到巴斯光年玩左一轉，又係時候轉回美國大街等候煙花時間。係距離20分鐘放煙花前，極速地食完係樂園入面的第二枝奶，最後幾分鐘，就企到大街中間看煙花，嘩！嘩！不過唔係我嘩，因為又係時候眼訓，所以我都係睇到矇豬豬，再加上旁邊正係賣氣球的地方，氣球上的閃燈好似比那些射到天空煙花來得更吸引！


短暫的煙花告終，當然唔會同人逼住走。於是都行了幾間shop，不過都無咩買。回到下午和聖誕老人影相的地方，天空有飄雪，可惜唔明顯，特別係樓頂那些風機的聲特大，真係咩mood都無。晚上9點幾，再坐港鐵返屋企，爸媽終於完成左一次遠征樂園6小時有多的創舉！

追加：話說這幾天剛變了新主題的迪士尼，其中一樣係雪亮聖誕的眼鏡，可以將平凡的燈光，看出個雪人來，大約就係下面張相咁。後來爸爸返到屋企反覆求證後，發現只要看在燈泡上就有呢個效果，慳電膽和光管係唔得o既！而且亦唔係立體眼鏡的，單眼都看到，事關橋妙就在膠片上。