今天我多了一個三嬸

2009年11月30日，爸爸下午放假回家，待我訓醒晏覺後說帶我去跟姑姐一起玩玩，我當然叫好就應承了出去。無幾耐，去到一個好多人的地方，突然，有個穿深色西裝的大塊頭踎著攤大手掌對著我，莫非收保護費......
然後，我被帶到一個房間，好多人，多到有d人無位坐，跟住有咩事會發生呢？......

於是，我唯有見人做咩我就做咩，例如見到人拍手，我又拍埋一份。而爸爸又千叮萬囑叫我靜d，點知我還是老實不客氣地提出要飲水水和食餅餅的要求......

原來這是我三叔的註冊日子，從今以後，我多了一個三嬸。

離開那個三叔被判終生監禁的地方，去了一個空曠的地方，所有人拍了個大合照。然後我便和太女麻傾計(溍爸：查實係度坐埋一邊食餅之嘛！但唔孤寒人人都請食餅就算你喇！)

食過餅，當然又精力充沛喇！咁就梗係唔少得run run run......咦！三嬸做咩係度拋野o既？原來係拋花球。

玩多陣，又係時候講再見，那個大塊頭，查實係我孻叔喇！雖然體型有極大差異，但都玩得埋架！孻叔你咁好玩，我錫錫你！