溍溍的"遲來"湯丸教室

團年食品之一，「湯丸」是也！現在去超市當然好易買到喇，花生、芝麻例牌；去婆婆屋企呢，就會食潮式的紅白粒粒湯丸。

爸爸見我去年在日本的農場參加團子教室整得幾開心，於是今個年三十為我準備了一個「梁家自家湯丸教室」，所採用的方法是傳承自太女麻係爸爸細個時過年整湯丸。

材料包括糯米粉(唔想太糯的感覺，可混入沾米粉)、片糖、凍滾水及薑(適量)，工具包括兜(或者大碗都得)一個、盒一個(或碟都得，用來放揉好的湯丸)及較剪一把(用黎剪開包糯米粉嘛！)

1. 先剪開糯米粉包，放入適量糯米粉去個兜度，唔使成包放，一包做年榚成底了；
2. 加入凍滾水，唔好加太多，邊加邊將粉混起，觀察濃稠程度，仲太水汪汪的可加入多些糯米粉，太稠就加點水；
3. 混好的粉感覺良好，就可以拿一小舊放在掌心上搓圓佢，之後用手指壓凹佢，再放入預先切細粒的片糖粒，再填好個窿再搓返圓；
4. 將搓好的湯丸粒放入已洒上一些乾糯米粉的盒/碟上，建議先雪一雪較好。

到煮喇，先煲糖水，加入片糖(剛才用剩的都可以放埋入去)、薑，當然仲有水，水滾放入湯丸，湯丸浮起就係熟左，食得！

雖然教室開得遲左，但上元佳節再整都得架，甜蜜蜜嘛！

p.s. 給家長們，製作和材料均慳水慳力，絕對適合佳節以外的親子活動，歲零就玩得喇！