48cm: 大坑火龍

爸媽帶了我去"太女麻"度，除了是和"太女麻"做節外，還有想帶我去看舞火龍。可惜呢個節日活動，已經成為了一個表演節目，人山人海，加上近年數碼攝影流行，個個哥哥姐姐、叔叔姨姨都雙手高舉，我得70幾cm高，睇手都厭高得滯喇！好在係"太女麻"屋企居高臨下，都算睇過下，以下落黎較詳細的解說，就由爸爸來辦吧！

這個係安在街口的花牌，在出面銅鑼灣道口的那個，還有英文13-15 September，攪表演活動，果真要中西合壁了！

未表演前放在大坑坊眾福利會的龍身，會移到新村街與安庶庇街交界位置作為表演的起點，幾十年如是(起碼爸爸出世後知道就係呢個位)。由於位置問題，在"太女麻"家只能看到部份龍頭。龍頭前果兩枝野，就係拮住個沙田柚的龍珠喇！

經過一輪鳴謝邊個邊個，又做了一輪儀式後，在龍頭的右方新村街會在地上點起火花，唔係BBQ，係點香，而那裡亦是龍珠插上香的地點。

這是"太女麻"屋企的另一邊，由於樓下有簷篷，只能看到這些人頭湧湧。

快開始了，一班名流鄉紳指揮官策劃人梗係影張大合照先喇，唔係邊有交待呀！

另一邊廂，龍鼓組配上螢光錦旗，仲有夜光燈車身大鑼大鼓中。爸爸說從前只是一架普通不過的木頭車而已。

好喇，繁文褥節後，插上香喇！準備起龍了！爸爸說，從前插上香之時，好多街坊都會落樓請舞龍的人幫手將幾枝插過係龍身上的香拔落黎拎返屋企插係祖先之類的神位上，有祈福消災好運的意思。現在表演前為免生混亂，龍身兩旁都是鐵馬工作人員和警察，據知在中場換香時(因八月十五表演時間較長，會換多一次香)，那時會將未消盡的香給街坊拿回家保留習俗。