幻彩香江

上星期六，爸爸因為隨住我o既成長而去了買枝新鏡頭，是Canon的55-250mm鏡，價錢只千幾蚊，但性價比very good。點解係隨住我成長而買，細個時矇豬豬，放係邊度影都得，而家大個仔喇，會爬來爬去，爬高爬低，仲會開始識避鏡頭，所以無枝長鏡點得呢？除此以外，事關我返幼潛的第一和最後一堂都可以影相，因為之前枝鏡唔夠長，於是好難影到大頭相片。是日黃昏，爸媽話帶我去街街，卒之去左尖沙咀，行左兩行已經快八點，而位置又正好去到海傍，於是就停係度睇幻彩咏香江喇！(查實係爸爸試鏡頭o者！)

查實爸爸試緊鏡頭，咔嚓、咔嚓緊o既時做，我係訓著左o既！當果十零分鐘表演完成後，人潮向四方散去，而爸媽就推著我架私家車向海運方向前進，呢個時候我終於醒左。去到海運，看過都幾無聊的火車表演，爸媽決定帶我過海，亦係我人生中第一次坐艇.......唔係唔係，係坐Star Ferry至真！坐艇o既係爸爸d股票o者！哈哈~~

今晚過海的人唔算多，而剛好又有船到，好快媽媽就抱住我上左船喇！

船外的香港夜景，似乎到我不太吸引，反而係果d櫈櫈，好好玩，我爬黎又爬去......幾分鐘船程，又係時候落船喇！係呢個moment，我地已經置身中環喇！由於已經係晚上9點幾，唔眼訓都肚餓喇我，於是爸媽極速向IFC方面進發，最後決定快靚正，去左IFC的麥當當晚飯，奈何我對蝦堡、Double魚柳包，甚至新地通通都無興趣，吃完我枝奶奶後仲攪攪震。

晚上十點幾快十一點，我地終於返到屋企，亦係我咁大個仔，第一次去街去到咁夜返屋企咋！