2009年2月1日星期日

農曆新年精華遊

一年容易又新年,年初一至年初七,日日都係拜年時。今年共出動了五天,包括:

年初一:第一站葵芳三姨家,與三姨丈的媽媽拜年。新正頭,溍溍先為大家用三姨個水晶球音樂盒為大家祈個福,呢個方法包無下簽出現,大家千萬個放心。根據卦象和眼前出現的畢業bear bear,牛年各位bb都會聰明伶俐,愛錫爸媽。
第二場係長沙灣表舅公家,去年表舅婆身體不佳入了醫院,今年已康復了很多和可以回到家中。第一次見面,都無失禮。

第三場轉戰土瓜灣契太婆家,去到例必食無憂,爸媽姨姨有木薯糖水啦、自家配方工廠製作的馬蹄榚和蘿蔔榚(契太婆家開餐廳嘛,d榚榚係姨婆配方,由於過去幾年大賣,今年要改到工廠生產添!)。我雖然無得食果d糖水和榚榚,但有轉轉轉全盒比我玩已經好滿足了!

是日尾場,大坑太女麻家和太女麻、女麻女麻、姑姐、三叔和孻叔盆菜晚飯,每年恆例節目之一。不過,我都係食我d粥粥,盆菜還是大人吃吧!
年初二:是日早上媽媽返工,所以可以輕輕鬆鬆。今朝早餐時間,爸爸教了我「啤梨、香蕉、蘋果、橙」。爸爸話新正初,所以唔教我士多啤梨,怕會比人鬧鬧。而且,bb識得「啤梨、香蕉、蘋果、橙」已經好勁咁話!
好喇,晚上時份,鑽石山外婆家開年!再來盆菜宴(同樣係100分出品),今晚我都食左成隻冬菇,仲試過鵝掌味添!
年初三:相約了基教幼潛兩期同學仔盈禧拜年,首先去左佢屋企。查實大家住得好近,雖然唔同屋苑,但行快兩步5分鐘就到。打攪哂之後輪到盈禧黎我屋企玩,由於媽媽今日返晏,所以下午都仲可以同爸爸大覺訓添!
年初四、五:爸爸返工,溍溍教育基金募集行動改由爸爸處理,無須現身已經有一疊利是到手。

年初六:是日星期六,爸爸收工回家後一家遠赴西環和細姨婆拜年。好少坐巴士的我今日坐904,等巴士時仲撞到住隔離屋苑的Kathy姨姨和Jackie叔叔添。大半個鐘後就到達西環細姨婆家了。我又食蛋榚又食沙田柚,口福不淺。
離開西環回家去,由於來程時爸爸比架巴士焗到wing wing地,攪到出門口前食果d年榚頂到上喉嚨,嘔得出黎咁滯,於是和三姨一齊坐了電車落中環轉港鐵。呢次都係我第一次坐電車,不過半途訓左,但總算叫做坐過。

年初七:萊叔與b朗來我家拜年,未黎到之前,爸媽帶了我落樓看舞獅。「咚咚撐撐、咚咚撐撐撐.....」yeah!<-唔係我yeah,係媽媽yeah,因為「大大聲測試計劃」成功!事關好多bb都好怕大大聲,今次我完全合格,勁呀!睇完屋苑外舞獅,過左隔離商場買野,買完上返平台玩,剛好獅子黎到屋企樓下,超近距離接觸都試埋,勁!當然我都合格埋!

睇完剛好b朗到達,好多個月無見,大家都大個仔哂!係屋企玩玩具、玩搶書書,之後同b朗玩埋show hand添。溍:「黎,我大你兩封利是!」b朗:「好,我跟!」
之後落返商場食晏仔,加上仲要等位,卒之兩個bb都入餐廳時訓哂!由於返屋企後又訓左,本打算去將軍澳拜年兼睇bb,卒之取消了!年初一至年初七的拜年活動暫告一段落。
10個月前後,兩b再平排影相,變化好大呢!上:2009年2月1日;下:2008年3月9日

4 則留言:

匿名 說...

除左搭lift依張,有無其他兩位公子都見樣又清楚既相,麻煩你e俾我。
thanks~

supageti 說...

b朗好似大份過溍溍喎 ~~

匿名 說...

我抱過b朗,重量都係溍溍重些少,b朗睇到大份,似老竇卦!ka..ka..ka...

匿名 說...

可能係b朗個頭大d,所以睇落大份d~