出院後一週報告之能力Up&Down

17日出院後至今已前後一週了，在這些病病的日子期間，溍溍的習慣和活動能力都起了點變化，例如：

UP/企的能力：可能因為醫院張床的床欄很高，溍溍成日攀起身企，而家屋企張床矮左，就仲容易企起來。

UP/爬行的能力：第一日出院爬得麻麻，可能成個星期未爬過。但幾日後可以爬得很快，爬去廚房，爬入廁所，仲要攀住馬桶企起身，唔通想自己尿尿？？仲有先兩日落平台公園玩(以前都係玩過一次)，竟然滑完滑梯後轉個身，手扶兩邊梯身，想轉頭爬返上去，真係前所未見！而爬落地亦多了用腳落地而唔係之前咁成日同頭落咁危險。

UP/爬升的能力：噚日(22日)，不知不覺，溍溍踩住個膠盒仔，就爬左上個裝玩具的膠盒上坐左係度，爸媽：「大鑊喇！」

UP/食的能力：一向唔多願幫襯媽媽的靚料愛心粥，係醫院嚐過啖茂茂粥後竟然激發佢食粥的能力，由以前食幾啖就扭計，到而家食幾十匙可也！但距離一d叻的bb斷碗計還有一段日子。而食奶奶方面，由入院前到入院期間下降至幾十至100ml，到現在已回復200ml一餐了。

UP/食藥的反抗能力：進展得最快的能力，由最初的見食藥就喊到擘大個口(咁就梗係益左爸媽一野就隊左d藥入口喇！)，到喊起上來時合實個口，再而用埋牙頂住唔比爸媽放個針筒入口，之後到即使隊了入口，就用脷頂，然後係喉嚨頂住，再bu返出黎，最後係連腳都撐埋。目前最高記錄係食五枝藥要搏鬥30分鐘。

UP/手指頭的運動：唔知點解，係醫院後期溍溍懂得將左/右手的食指頭疊在中指頭下面，之前係唔好的。

UP/拍or拉的能力：從前在床邊的大衣櫃門，溍溍只懂摩下摩下，自從係醫院識得企係度拍床邊的玻璃窗後，返到屋企當日，就已經懂得大力拍打床邊的衣櫃門。而從前企係度都唔會拉床上轉轉的音樂魚仔，出院返到屋企當日，直頭舉起手拉d魚落黎添！

UP/精力：Up得最利害的一瓣，可能病病後好返，玩極唔停，玩極唔訓，朝早5點幾6點就醒，其時睡夢中的爸媽最想就係：「阿囝，大家訓多陣好唔好？」

DOWN/體重：入院後好明顯瘦左，不過而家食得訓得，已經慢慢脹返多少囉！

DISAPPEAR/沖涼前的習慣：話說每次溍爸幫溍溍除好衫和片片準備落水沖涼前，溍爸會拍幾下手掌，訓係度的溍溍就會好興奮咁等溍爸抱起佢放落浴盆，而家magic失效，可能同成個星期無得係屋企沖涼有關吧！

出院當日，面都瘦哂呀陰公...

而家扶住床的兩邊，轉來轉去可也，頭上的魚仔成為被拉扯的目標之一！

星期日去睇兒科醫生收鼻水和pat pat紅腫(係醫院係無流鼻水的，而patpat受罪係因為係醫院食d藥令溍溍好易便便尿尿，焗得多所致)，第三次帶上口罩的模樣(第一及二次係18日入院早上係QE帶的)

每逢準備食藥(都未拿起針筒)，就發哂顛，針筒都未送到咀邊，頭上的汗已經標哂出黎！

呢一次就無端端爬左上個膠盒上的一次喇！

這個疊手指的動作，係醫院時首次發現！

第一次見到係滑梯想爬返上去